بعد الهجوم على بيومي فؤاد.. مصطفى بسيط: افهموا إنكم بتشاركوا في تقطيع بني آدمين زيكم
علق الفنان مصطفى بسيط على هجوم الجمهور على الفنان بيومي فؤاد، وذلك بعد تعبيره عن رأيه في موقف الفنان محمد سلام، واعتذاره عن مسرحية زواج اصطناعي بسبب أحداث فلسطين.
وقال مصطفى بسيط على حسابه الرسمي بـ انستجرام: الفتنة خلاص كل الناس شيرت اللي مع واللي ضد.. وكله كتب بوستات وشير واتبسط.. خلاص خلصنا مزايدات على بعض وخونا وكدبنا بعض.. افهم إنك بتشارك في تقطيع بني آدمين زيك زيهم.. وكلهم بيدافعوا عن نفس القضية.
وأضاف مصطفى بسيط: طب كل ده عشان ايه التريند والسوشيال ميديا اللي بقت بتحركنا كلنا، لدرجة إننا بنشير اللي لينا فيه واللي ملناش برضو فيه، وقررنا فجأة أننا نستبيح الناس وأعراضها وعائلتها كل ده عشان اللقطة أو الريتش، وبقى كل حد من حقه أنه ينتقد ويشتم في الناس طالما مفيش حد هيحاسبه.
واستكمل مصطفى حديثه: بس خليك فاكر إن مفيش حد هيحاسبك على كلامك وفتنتك دي هنا في السوشيال ميديا، لكن لما يتوفانا الله ويوم الحق، وأعرف كويس أن أي بوست أو كومنت أو هجوم على شخص أنت متعرفش عنه حاجه ربنا هيجيبله حقه منك ومن غيرك ربنا العدل لأنه قال: ما يلفظ من قول إلا لديه رقيب عتيد.. فخليك فاهم كويس إن كل لفظ وكلمة هتطلع منك بتتكتب وهتتحاسب عليها.
واختتم مصطفى حديثه: أنا مش بدافع عن حد، أنا لا مع ولا ضد لأن مش لازم كل حاجة يكون ليا فيها رأي.. ربنا يهدينا جميعًا ويصبر أهالينا في فلسطين.
ووجه بيومي فؤاد رسالة لـ محمد سلام خلال عرض مسرحية زواج اصطناعي في السعودية، قائلًا: من حقك تعتذر عن المسرحية لكن مش من حقك تغلط في فنك.
