أنا ضد إننا نجيب أطفال عشان يكونوا سند وعملت نفسي بنفسي.. أبرز تصريحات إليسا التليفزيونية
ردت الفنانة إليسا على المتنمرين عليها، وخاصة على فمها، بجانب حديثها عن مفهوم الأمومة في حياتها، مشيرة إلى أن الأبناء لا يعتبرون سندًا.
وقالت إليسا خلال تصريحات تليفزيونية: أنا مش بزعل لما حد بيتنمر عليا، أنا بزعل عليهم لأن إزاي عايشين حياتهم؟، وشوفت فلتر بيتمسخروا على فمي، وده آخر همي.. أنا إليسا يا حبيبي وأنا عملت كل حاجة في حياتي لكن أنت اللي بتتنمر مين؟، أنت معندكش وجود وصورتك افتراضية.
إليسا: أنا شخص عمل نفسه بنفسه.. وفي بداياتي مكنش حد مؤمن بيا
وأضافت إليسا، متحدثة عن مشوارها الفني: لما ببص للـ 23 سنة اللي مروا، واللي أنا قدمته أو حققته، بكون فخورة إني شخص عمل نفسه بنفسه، لأني أول ما بدأت مكنش في ناس كتير مؤمنين بيا، ولا بموهبتي فمن هنا جالي روح التحدي والإيمان بكل حاجة عايزة أعملها.
وأكملت إليسا: من هذا المنطلق حطيت أهداف حياتي، وكل ما أحقق هدف بحط اللي بعده، وبخطط إني أوصل خطوة خطوة لأن اللي بيوصل على طول بيقع على طول، وبستغرب لما حد بيتكلم عن نجوميتي بينسوا القاعدة الجماهيرية والجمهور اللي اتقبلنا ودايما بيخلينا نتحدى نفسنا ويخليني عايزة أكون أفضل وأكون عند حسن ظنهم لأنهم حطوا ثقتهم فينا.
إليسا: بروح لدكتور نفسي وأنتوا مش لوحدكم
وعن تجربة الذهاب للطبيب النفسي، قالت إليسا: مش بتكلم عن حاجة غير عن تجربة وبقول إني روحت عند دكتور نفسي عشان أقول للناس إنكم مش لوحدكوا، أنا زيكم، وساعتها ده بيبرر القوة اللي أنا فيها، إنه منخليش حاجة تكسرنا رغم كل الظروف اللي بنمر بيها.
إليسا: مريت بعلاقات حب فاشلة وسامة
ثم تطرقت إليسا للحديث عن علاقاتها، قائلة: كتير مريت بعلاقات ندمت عليها زي كل بنت لأن في الآخر أنا ست وأكيد مريت بعلاقات حب فاشلة وسامة، وندمت ومندمتش، لأن كل حاجة في الحياة بناخد تجربة منها، وأوقات التجربة بتكون قاسية، ووقت الزعل محدود والوقت كفيل يداوي أي جرح، وبنتعلم من ده وبنعرف.
وأشارت إلى أن فكرة أن الأبناء سند لأهلهم هو موروث مجتمعي خاطئ، قائلة: هل النساء اللي ربنا مدهمش ولاد يعتبروا ناقصين؟، هل الراجل اللي معندوش ولاد يعتبر ناقص؟، لأ، وأنا كـ مرأة ليا أدوار كبيرة في الحياة، وطبعا أكبر دور بتقوم بيه المرأة هو إنها تكون أم.
إليسا: الأولاد مش سند
واختتمت إليسا: بس لو مبقتش أم فهي أخت هي مربية هي صديقة هي زوجة، وده كله فيه أمومة، وأنا بكره كلمة إن لازم تجيبوا ولاد لآخرتكم، ليه مين شاف ولد فضل قاعد مع أهله لما كبروا، وفي أهل ماتوا لوحدهم لأن ولادهم سافروا وسابوهم، فده موروث اجتماعي وكلام غير منطقي، والولاد مش سند.
