كريم فهمي: مراتي مكنتش عايزاني أكمل في التمثيل.. ومشكلتي التسرع في قراراتي
تحدث الفنان كريم فهمي عن زوجته دانيا ومشاركتها معه في تفاصيل حياته، وعن علاقته بشقيقه الفنان أحمد فهمي، وفلسفته في الحياة، مشيرًا: راضي بشكل كبير عن حياتي.
وقال كريم فهمي في تصريحات تليفزيونية: الزمن بالنسبالي خبرة حياتيه كل ما تكبر في السن وتعيش مع ناس أكتر بتكتشف حاجات.. وأنت صغير بتكون غلبان وبريء أوي، وبتكبر وتكتشف أن الناس الطيبة مش شرط يكون وشها طيب.
وأضاف كريم فهمي: عندي فكرة أن ممكن يتقال عليا ناشف شويه، ومن فترة كنت بتفرج على فيديو لعمر طاهر بيتكلم عن الجيل بتاعنا اتأثرت جدا قال إن جيلنا رابط بين جيلنا جيل كبير وجيل صغير.
كريم فهمي: دايما شايل هم شغلي.. وأنا شخصية متسرعة وبحاول أغير ده
وعن طفولته استكمل كريم حديثه: الطفولة والنستولوجيا بتأثر فيا خصوصا أني كنت طفل طيب اوي، ودايما شايل الهم في شغلي سواء تأليف او تمثيل.
وعن علاقته بشقيقه أحمد، أوضح كريم: طول عمرنا أنا وأحمد شخصيتنا مختلفة تماما ممكن نقعد أسبوع منشفش بعض بس في رابط بينا مفيش حاجه بتبعدنا عن بعض كـ اخوات.. وأحمد أخويا الكبير أكبر مني بسنتين وشهر، وأنا أهم حد بالنسباله في حياته.
وعن فلسفته في الحياة، قال كريم: عندي حنين كبير للماضي الذكريات بتاعه الطفولة دي عندي كبيرة اوي وبحن لفترة أني بلعب فيها كورة وفي الأهلي.. وبحن للفترة أني كنت شايف الناس كلها كويسة ومفيش ظلم خالص وأنا راضي بشكل كبير جدًا ومش عايز حاجه أكتر من كده.. والرضا اللي بيصنع السعادة مش أي حاجه تانية، وأنا بني ادم متسرع شويه وبحاول أغير من ده.
واختتم كريم حديثه: أنا مبعرفش اشتغل حاجه مش بحبها ومش بمشي ورا المفروض، وأول ما اتعرفت على مراتي كنت لسه بعمل أول مسلسل ليا وهو عرض خاص وكنت كاتب بيبو وبشير وكانت حابه أكتر أكون مؤلف مش ممثل وكانت عايزاني أعيش من غير شهرة ومع الوقت حبت اللي أنا بحبه، وعندي مشكلة ان قرارتي سريعة.. أنا ضد فكرة الديكتاتورية في البيت رأيها بالنسبالي مهم جدا بحب رأيها في كل حاجة.
