حنان مطاوع تكشف تفاصيل استئصالها الغدة الدرقية: اتشخصت غلط وكتبت وصيتي قبل العملية
كشفت الفنانة حنان مطاوع تفاصيل تعرضها لوعكة صحية وإزالة الغدة الدرقية، موضحة أنها من أصعب الفترات التي مرت بها في حياتها ومن أصعب التجارب، وذلك بعدما تم تشخصيها بصورة خاطئة في بداية إصابتها.
وقالت حنان مطاوع خلال لقائها مع الإعلامية منى الشاذلي، في برنامج معكم، المذاع عبر شاشة قناة ON: الحمد لله على كل شيء، أنا من حوالي 4 أشهر ونص عملت عملية الغدة الدرقية، وقبل العملية حالتي اتشخصت حاجة خطيرة جدًا، والمصيبة إن التشخيص مش من دكتور، والموضوع تضخم قبل ما نستشير الدكتور أو الجراح، ودخلنا في دوامة الوهم أنا وجوزي.
وأضافت: ارتبكت جدًا لدرجة إني بدأت أعمل مسح ذري، والأعراض كانت ضيق تنفس ولما يجيلي دور برد صوتي يتشرخ ويرجع بعد 4 أشهر، ورقبتي بقت عريضة جدًا غير دلوقتي، لأنهم شالوا منها نص كيلو تقريبًا، ولكن كتير قالولي أنتي عندك غدة درقية وأنا كنت بعمل وظائف وتطلع كويسة، واللي عملوا السونار دخلوني في نفق مظلم ووهم.
حنان مطاوع: جوزي لما عرف مرضي عمل نفس مشهدي مع هند صبري في حلاوة الدنيا
وكشفت حنان مطاوع رد فعل زوجها، قائلة: أنا بقيت مش شايفة حاجة في الدنيا غير بنتي أماليا ومرتبكة جدًا، أمير جوزي عمل معايا نفس المشهد بتاعي مع هند صبري في حلاوة الدنيا، وطلع من غرفة الكشف كلم كل الدكاترة في العيلة، وبعت لهم صور السونار وسألهم يعمل إيه، ودخل عندي وشه لونه أزرق وفهمت من أداؤه إني مش كويسة.
وواصلت: الحمد لله طبعًا وربنا يشفي كل مريض، هي كانت تجربة وحشة أوي، وطول الوقت بحمد ربنا وشاكرة طول الوقت، ومتمنية إني أعيش علشان أبقى مع بنتي أماليا.
وأشارت الفنانة حنان مطاوع إلى أنها كتبت وصيتها قبل دخولها عملية إزالة الغدة الدرقية، قائلة: أنا كاتبة وصيتي من وأنا صغيرة زي ما وصانا الرسول صلى الله عليه وسلم، ولكن كل فترة بغيرها على الظروف، دلوقتي اتجوزت وعندي بنت، وقبل ما أدخل العمليات كتبت وصيتي.
واختتمت حنان مطاوع: أول وصية ليا كتبتها وأنا عندي 25 سنة، وكنت موصية أن جزء من فلوسي اللي كانت كلها 1000 جنيه يروح جزء منها للحاجة اللي مربياني والباقي يتقسم على صاحباتي، ماما هتتجنن من الأفكار اللي بتجيلي ولكن هي مش أفكار سوداوية، أنا مؤمنة أن في رحلة بنبيها في الدنيا وفي رحلة في الآخرة.
