أبرز تصريحات جمال العدل التليفزيونية.. بعتذر ليسرا وفيه مئات الممثلين مش لاقيين ياكلوا
حل المنتج جمال العدل ضيفًا على أحد البرامج التلفزيونية، وتحدث خلال اللقاء عن حقيقة خلافه مع الفنانة نيللي كريم، وخلافه مع الفنانة يسرا والفنان محمد هنيدي، بجانب كشفه آرائه الشخصية في بعض الفنانيين.
أبرز تصريحات المنتج جمال العدل
- أنا كمنتج يهمني النجمة الشاطرة، أنا بموت في نيللي كريم؛ لأن عمرها ما ركبت رموش ولا بتحط ميك آب، وعمرها ما كان لها طلبات هي ست جاية تعمل دورها وتمشي.
- ماتخنقناش أنا ونيللي الفترة اللي فاتت، وأنا بعتبر نيللي كريم ومحمد هنيدي من مؤسسي العدل جروب، والعلاقة بينا تعدت علاقة الشغل وبقينا إخوات وأصحاب، وأنا كنت وكيل نيللي في الفرح.. والله هي ما بلغتني إنها زعلانة.
- كان المفروض أن نيللي تعمل مسلسل واحة الغروب وبعدين عملته منة شلبي، وأنا صعب عليا أن نجمتي تقعد وغيرت النص كله بتاع مسلسل تحت السيطرة علشان هي تبقى موجودة فيه؛ لأنه كان بيتكلم الأول عن الشباب الصغير.
- عمري ما كان في بيني وبين ممثل عقد احتكار، ويسرا بتمثل من غير عقد.
- هند صبري بتنتج لنفسها علشان تقدم أدوار نفسها تعملها.
- هند صبري أشطر ممثلة جت مصر من الجيل الجديد.
- إحنا في وقت مشابه لأيام ما عملنا فيلم صعيدي في الجامعة الأمريكية، وهمام في أمستردام، لما كان الجيل العظيم جيل محمود عبد العزيز ونور الشريف ومحمود ياسين كبر شوية، والسوق محتاج ناس جديدة.
- أبطالنا الموجودين حاليا حلوين جدا، لكن 4 أو 5 أنفار ما يقدروش يشيلوا السينما المصرية كلها، والتوقيت مناسب لتقديم جيل جديد.
- أحمد السقا حاليًا مشغول بتصوير مسلسل في لبنان، وماضي فيلمين أو 3 أفلام، وأحمد عز وكريم عبد العزيز وأحمد حلمي نفس الموضوع، وعلشان أعمل فيلم للسقا لازم انتظر سنين.
- أنا شخصيًا متحمس لأدريانو لأنها شخصية داخل فيلم همام في أمستردام، ونشوف بعد 20 سنة حصل إيه مع الشخصية.
- المفروض محمد هنيدي يتعب على نفسه شوية عشان يعمل حاجات أحسن من كده، لأن هو جر جيل كامل ولسه عنده اللي يقدمه.
- هنيدي بيعمل الجزء التاني من أرض النفاق من غيري، للأسف وهو حقه قانونًا، لكن فيه حق أدبي وحق مادي، وأنا ليا الحق الأدبي، لكن في رأيي أنه مش هينجح.
- عبلة كامل زارتنا في الشركة من سنوات وشعرت وقتها أنها لن تمثل مرة أخرى، دون أن تدلي بأي تصريحات أو تؤكد أو تنفي أي شيء.
- عبلة كامل مقالتش مش هتمثل، وعمرها ما قالت الفن حرام، وآخر أعمالها كانت محجبة وهي فنانة خاصة جدًا ومفيش شبه لها.
- الوحيدة اللي زعلتها بشكل غير مقصود، يسرا وهات يسرا على جنب ومصر كلها على جنب، كل الناس تزعل إلا يسرا.
- عايز أقول للجمهور في ممثلين رائعين مش لاقين يأكلوا، وبيخدوا فلوس زهيدة جدًا، وفي ناس مش بتعرف تدير نفسها وفي مئات الممثلين مش لاقين يأكلوا.
- رهان كريم عبد العزيز كسبان طول الوقت، وهو أنضج وألطف واحد في كل الجيل، وأتمنى أعمل حاجة معاه.
