ريم طارق: بفكر في مستقلبي وعاوزة أكون ناجحة.. مش عاوزة حد يشاور عليا يقول طليقة حسن شاكوش
كشفت ريم طارق طليقة مطرب المهرجانات حسن شاكوش، أنها تشغل نفسها وتحاول أن تخرج مع أزمتها مع طليقها والتي عانت بسببها كثيرًا، مشيرة إلى أن كل ما تفكر به هو مستقبلها ونجاحها وتتمنى أن لا يناديها أحد بطليقة حسن شاكوش وأن لا تنجح على صيت شخص آخر.
وأشارت ريم طارق في تصريحات لـ القاهرة 24، إلى أنها مرت بفترة صعبة جدًا تحاول أن تحرج منها، قائلة: الموضوع بالنسبة لي كان أصعب في البداية لأني ما كنتش شخصية عامة ومحدش يعرفني، وعمري ما دخلت في جدال على شخصيتي وكنت بعيدة عن الدايرة دي، وده اللي تعب نفسيتي، ولكن كمشكلة عادي كل الناس بيحصل لها مشاكل، لكن أن تعرضت لأذى كبير وناس كتير اتكلمت في الأعراض واذتني نفسيا.
وأضافت ريم طارق: لو اتخدعت من شخص أو اتنين معناه أني واحدة ساذجة أو بصدق اللي بيتقال لي ومش بخون، بقول يمكن كويس ويمكن اللي اتكلموا عليه وحش بيتبلوا عليه، وما تخيلتش أن الموضوع يحصل لكده، ومفيش حد كبير على الغلط مهما كنت ضامن وواثق، ولكن فيه مشكلة عامة أن ما بقاش حد عنده مسؤولية وكتر الحاجات الغلط اللي بتتعمل مسهلة الطلاق وخراب البيوت.
واستكملت ريم طارق: لو كنت داخلة الجوازة من الأول علشان اطلع بحاجة كنت كتبت حاجات كتير، لأنه قال اطلبوا اللي أنتم عاوزينه، وإحنا ما طلبناش منه حاجة، لكني كنت داخلة ابني بيت.
مستحيل اتجوز علشان فلوس أو مقابل فيلا أو عربية
وتابعت ريم طارق طليقة حسن شاكوش: ربنا مديني عقل ومتعلمة وشاطرة وكويسة واعرف اشتغل ايه اللي يخليني أدور على جوازة علشان الفلوس وأنا كنت بفكر في مستقبلي قبل جوازي من حسن، ومستحيل اتجوز علشان فلوس أو مقابل فيلا أو عربية والعالم كله يتكلم على سمعتي وشرفي.
عاوزة اسمي يكون ريم فقط مش طليقة حسن شاكوش
وواصلت ريم طارق عن ما تتمنى أن تصل له: مفيش حاجة معينة في دماغي بعمل أي حاجة تخليني اخلص من القصة دي، وحابة الغي قصة طليقة حسن وعاوزة اسمي ريم فقط، مش عاوزة حد يشاور عليا يقول طليقة حسن، مش عاوزة أنسب اسمي لحد ولا اتشهر على قفا حد ومفيش حد بيتشهر على سمعته وشرفه وخراب بيته دي مش حاجة حلوة، لأن أنا بيتي اتهدم وناس اتكلمت في عرضي.
وأردفت: الموضوع كبير وناس كتير ماكنتش واخدة بالها أني ممكن ادخل في انتكاسة وده كله كتير على واحدة داخلة تتجوز وتخلف وكل من هب ودب يدخل يقول فيها وفيها، وأنتم ما تعرفونيش وأنا مش شخصية عامة علشان تتكلموا عني، اتكلموا على الشخص التاني له جمهور أنا مالي، ولو على الشهرة أنا محدش شافني لما اتجوزت وما استخدمتش الشهرة وهي صح هستخدمها وهي غلط؟
وواصلت: مش عاوزة حد يشاور عليا يقول طليقة حسن شاكوش، وكنت عاوزة في الأول اسمي يتمسح من ذاكرة الناس ولكن لقيت أني كده كده اتعرفت والناس شافتني، وقلت هظهر لكم بس عاوزة اعمل أي حاجة تبعدني تماما عن المشكلة، خاصة أن حسن مش الشيخ الشعراوي علشان اتشهر على حسه، ولا البروفيسر أو عمرو دياب.
