باهر دويدار: الهجوم على بيومي فؤاد مبالغ فيه.. الناس طلعت غضبهم من إسرائيل عليه
عبّر الكاتب باهر دويدار عن رأيه في الهجوم على الفنان بيومي فؤاد، مشيرًا إلى أن الهجوم الذي تعرض له غير مبرر ومبالغ فيه.
وقال باهر دويدار خلال تصريحات تلفزيونية: مش عارف كواليس اللي قاله بيومي فؤاد، ولكن أنا شايف القضية أكبر من شخص بيومي فؤاد، الهجوم على بيومي مرعب ومبالغ فيه جدًا، وإحنا عمالين بنتشحن بغضب بقالنا شهر وغضبانين ومتغاظين ومش طايلين إسرائيل عشان نعمل فيها حاجة، فلما طولنا بيومي طلعنا غضبنا فيه.
وأضاف: عايز الغضب ده يتوجه في حاجة مفيدة وإيجابية؛ لأن المعركة لسه مطولة، حتى لو هو أخطأ خلاص، حر في وجهة نظرك، لكن حجم الغضب خطورته متوجه في المكان الغلط، هو مش عدونا، مش هو ده اللي بيضرب غزة، ومش دفاعًا، الفكرة إن الغضب يروح في مكانه المظبوط.
باهر دويدار عن محمد سلام: عبّر بمنتهى الصدق والشجاعة عن رأيه ولم يدّعي البطولة
أما عن رأيه في اعتذار الفنان محمد سلام عن مسرحية زواج اصطناعي، قال: أنا صدقت محمد سلام لما شوفت الفيديو هو راجل اتكلم بمنتهى الصدق والشجاعة، في خلال الشهر اللي فات ده مش قادر اشتغل بنفس كفاءتي من جوايا محروق، فهو سلام اتكلم بصدق كأنه بيطلع اللي جواه، حتى لم يدّعي البطولة، لو أنا مكانه هبقى عارف إني بخسر كتير، واحترمت شجاعته.
