كنت في حالة ذهول.. أحمد حلمي يكشف كواليس لقائه الأول مع الفنان أحمد زكي
حل الفنان أحمد حلمي ضيفًا على حلقات الموسم الثاني من برنامج Sold Out، الذي يقدمه الإعلامي محمود سعد، وخلال لقائه كشف كواليس لقائه الأول مع الفنان الراحل أحمد زكي.
أحمد حلمي: لما قعدت مع أحمد زكي كنت في حالة ذهول
وقال أحمد حلمي: أول مرة تعرفت على أحمد زكي كان عن طريق عمر عبد الحليم، كنت بشتغل معاه كمساعد مخرج، وكان عمر يغطي مهرجان الإسكندرية، قال ليا أنزل وشوف الأستاذ أحمد زكي في المطعم فاضي علشان نسجل معاه الحوار، نزلت وسألته، فقال: طبعًا فاضي وقعدت معاه سألني عن اسمي، وكنت في حالة ذهول.
تصريحات أحمد حلمي
استكمل أحمد حلمي حديثه قائلًا: قلت له في فيلم زوجة رجل مهم، لما قٌمت بحركة الشنب، هل كان في السيناريو أم ارتجال منك؟ قالي لا كان ارتجال مني، سألته سؤال تاني قُلت له في فيلم ضد الحكومة التفة اللي كانت في الفيلم، ده مكتوب في السيناريو، قال لا أنا اللي عملتها، قلت له في فيلم استاكوزا وأنت قاعد مع حسين الإمام لما قالك لو معاك مليون هتعمل إيه؟ قلت له هخلي والدتي تحج وهفتح مصنع لوالدي هل كان مكتوب في السيناريو، قالي كان مكتوب ولكن أنا قدمته بطريقتي.
وأضاف أحمد حلمي: ولما دخل عمر علشان يبدأ الحوار أحمد زكي قاله أكتب الأسئلة اللي قالها أحمد حلمي، ولكن أكتب في الحوار طالب من معهد السينما وأنا مكنتش طالب في المعهد.
