هاجر عامر تكشف كواليس الـ 10 دقائق الحاسمة قبل تتويج سلة سبورتنج على حساب الأهلي| حوار
اختصت هاجر عامر كابتن فريق السلة سيدات بنادي سبورتنج، القاهرة 24، بحوار تكشف فيه سر التتويج ببطولة دوري المرتبط على حساب الأهلي، وتكشف كواليس البطولة العائدة لخزائن النادي بعد غياب.
وتروي هاجر عامر كواليس الـ 10 دقائق الأخيرة من عمر مباراة الإياب أمام الأهلي والتي حسمت التتويج للفريق السكندري، ورسالة خاصة إلى رفقائها في الفريق.. وإلى نص الحوار.
ما الصعوبات التي واجهتها في منافسات البطولة؟
أكيد كانت بطولة صعبة كانت غايبة عن سبورتنج كتير، كان عندنا مشاكل إن فريق المرتبط يخسر وإحنا نكسب، والموسم اللي فات المرتبط كسب وإحنا خسرنا، لكن الموسم دا قدرنا نفوز بالبطولة، فكانت بطولة مهمة وحلم عندنا أننا نحققها.
هل هناك لحظة فقدت فيها الإيمان بالفوز وحصد البطولة؟
مفقدتش الإيمان بالفوز في المباراة أمام الأهلي، الفرق مكانش كبير 3 بنط أو 5 ولما كبر كان 7 بنط، لم أشعر باليأس، ولعبة الباسكت هي لعبة ثواني، يعن لو فارق 5 بنط ممكن يجوا في 5 ثواني، الشوط الرابع كان لازم نستموت عشان دول أخر 10 دقائق ويساوي بطولة.
ما الحافز الذي جعل سبورتنج يعود أقوى من جديد؟
الحافز هو أإننا عاوزين نكسب تعبنا كتير تدريب صبح وليل، وبنشتغل مع بعض وبنتفرج على فيديوهات، تعبنا أوي للحظة دي.
ما أصعب لحظات المباراة الثانية أمم الأهلي بالنسبة لكِ؟
مفيش لحظة معينة، مش فاكرة حاجة بسبب التركيز في كل ثانية بالمباراة، مش بفكر في الاسكور ولا اللي بيحصل غير الهجمة سواء كانت علينا أو لينا، فبالنسبة ليا مفيش لحظة صعبة غير الخسارة.
ما أبرز ما قاله محروس المدير الفني وقتما كنتم متأخرين في النتيجة أمام الأهلي؟
كابتن محروس دائم التشجيع، يلا نكسب موتوا نفسكم لآخر دقيقة، وهتقدروا وتكسبوا، بالإضافة إلى الدافع الداخلي.
كيف استطعتن تعديل النتيجة والفوز بالبطولة؟
رجعنا للماتش بتوفيق ربنا، ولعبنا باسكت وكل واحد ركز في القرار اللي طالع منه، والهدف الأول والأخير هو إننا نكسب، كل واحدة ترمي نفسها على الكورة ونحاول مرة واتنين.
ما سر الفوز وتطور أداء سبورتنج في الفترة الحالية؟
الموسم الماضي تأثرنا بعدة عوامل منها رحيل عدد من العناصر على الرغم من أننا حصدنا بطولة إفريقيا، في الموسم دا عملنا تدعيمات قوية لاعبات شكلوا الفارق مع الفريق وظهرنا بالمستوى القوي دا.
ما هدفك في الفترة المقبلة؟
الهدف إننا نحقق السوبر والكاس مع سبورتنج إن شاء الله وبطولة إفريقيا اللي هتكون في الأهلي والمحافظة على اللقب
ما رسالتك إلى زميلاتك بعد الفوز بالبطولة؟
إلى زميلاتي.. انتو عيلتي ومحظوظة إني معاكم وفي الفرقة دي كلكم بتحبوا بعض، وهدفنا إننا نكسب، إخواتي
كيف ترين المنافسة في الموسم الجديد من الدوري؟
الدوري الموسم ده هيكون قوي، في البست أو مع الأهلي لإنها في الأغلب بتكون ما بينا وبين الأهلي، أو الفرق اللي ممكن توصل للنهائي.
كيف يمكنك الموازنة بين التزاماتك الشخصية والملعب؟
أنا بحاول على قد ما أقدر بمساعدة أمي إني أوازن بين كل شيء، أروح الكلية والتدريب وكمان أمينة لكن فعلا أنا بحاول أحقق كل شيء بشكل جيد.
لو بأيدك القرار.. مين اللاعبة من الأهلي اللي تضميها لسبورتنج؟
نادين السلعاوي هي اللاعبة اللي نفسي تكون معانا في سبورتنج، فاهمة باسكت وبحب ألعب معاها، ولو جت هتكون إضافة رهيبة لسبورتنج.
