وليد فواز: معرفش عملت إزاي شخصيتي في مسلسل السبع وصايا.. محمد أمين راضي له طريقة مميزة في الكتابة
كشف الفنان وليد فواز كواليس مشاركته في مسلسل السبع وصايا، الذي عُرض في موسم رمضان عام 2014، وحقق خلاله نجاحًا كبيرًا من خلال شخصية أحمد عرنوس.
وقال وليد فواز، في ندوة تكريمه بـ القاهرة 24: شخصية أحمد عرنوس جاتلي بسبب نجاحي في مسلسل بدون ذكر أسماء، والأستاذ محمد أمين راضي من عشاق الأستاذ وحيد حامد، ولما شاف شخصيتي كلمني وقالي إحنا مرشحينك في دور أحمد عرنوس وبعتولي الورق وقرأته ولاقيت إنها شخصية مختلفة، وحسيت أن العمل ممكن يجيب في الشارع والنجاح بـ إيد ربنا ولكن علينا السعي.
وتابع وليد فواز: دخلت العمل فيه أسماء كبيرة الأستاذ محمد أمين راضي وخالد مرعي وشركة الإنتاج، والممثلين اللي كنت معاهم أستاذة رانيا يوسف ومحمد شاهين وهيثم أحمد زكي رحمة الله عليه، يعني توليفة صعب الواحد يرفضها ومفيش أفضل من كدة بعد مسلسل بدون ذكر أسماء، ودخلت المسلسل ووالله ما أعرف عملت الشخصية دي إزاي، الشخصية كانت حلوة جدًا ومحمد أمين راضي له طريقة مميزة في الكتابة.
كما كشف وليد فواز، تفاصيل أولى المشاهد التي جمعته بالفنانة هنا شيحة، وكواليس احتضانها، قائلًا: كان أول مشهد ليا في المسلسل وكان فردي وكان معايا هنا شيحة وبتقولي في المشهد البراح بيقل وأنا بحاول أطبطب عليها وهي مكانتش واخدة عليا، وأنا حسيت إنها مش حابة واحترمت ده، وأستاذ خالد مرعي وقف التصوير وسألها مالك يا هنا؟ قالتله مفيش حاجة ولكن حاسة أن المشهد ده الأحسن إني أكون لوحدي.
وأضاف وليد فواز: قالها بالعكس أنا شايف أن في اللحظة دي الشخص الوحيد اللي محتاجاه هو جوزك اللي هيحتويكي في الوقت ده، لما عملت المشهد ده كل الناس أشادت بيه، وبعد كده انطلقنا، وهنا بقت بتثق فيا.
مسلسل السبع وصايا
شارك في بطولة مسلسل السبع وصايا، كل من: الفنانة رانيا يوسف، الراحل هيثم أحمد زكي، ناهد السباعي، صبري فواز، أيتن عامر، ناهد السباعي، هنا شيحة، وليد فواز، والعمل من تأليف محمد أمين، وإخراج خالد مرعي.
