متجوزتش تاني علشان مجبش لأولادي حد يؤذيهم.. أبرز تصريحات صفية العمري التليفزيونية
حلت الفنانة صفية العمري ضيفة على أحد البرامج التليفزيونية، وتحدثت خلال اللقاء عن تفاصيل حياتها الشخصية ومشوارها الفني.
أبرز تصريحات صفية العمري التلفزيونية
- مقدرتش أحقق ثروة من الفن ومكناش بنفكر في المادة خالص وكنا بنحب نشتغل للفن.
- لما خلصت مسلسل ليالي الحلمية جالي مسلسل هوانم جاردن سيتي ولقيت أجري صغير أوي وكان مهين جدا فقلت لهم معقولة؟ فالناس قالولي انتي غلطانة المفروض ترفعي أجرك، أنا مكنتش برفع الأجر وكنت شغالة لحبي للشخصيات.
- لما جيت أرفع أجري الناس قالوا لي إنتي اللي غلطانة ولقيت نفسي صغيرة وعمري ما فكرت في أجور.
- أنا أخذت جوائز وعملت تاريخ كبير جدا ومقدرش أقول منجحتش في الدراما والسينما.
- زمان كان فيه كتاب وأدباء بيكتبوا للسينما وكان فيه فن هادف وحاجات راقية وموضوعات مهمة جدا وشايفة دلوقتي العملية تجارية أكتر والفنان نفسه عايز يشتغل.
- السينما النظيفة كلمة وحشة ومهينة ومينفعش نقول كده، والسينما فن راقي بتقدم مواضيع فيها فن وفيها تجارة، الكلمة معصباني وده كلام عيب قوي.
- نجوم الزمن الجميل وأفلام الأبيض وأسود كان في مشاهد تقدم ولكن لم يحدث أي تعليق مهين أو غير أخلاقي على الملابس أو المشاهد.
- مكنتش عايزة أعمل الجزء السادس من ليالي الحلمية وامتنعت ورفضت، لكن إلهام شاهين وهشام سليم طلبوا مني أنزل وكنت معترضة وشايفة الشخصية دورها خلص.
- مش بخاف من غدر الرجالة ولا الزمن، واللي بخاف منه تيجي لحظة وولادي بعيد عني وميكنوش جنبي.
- مكنتش بعمل للزمن أي حساب وكنا بنشتغل طول الوقت للفن ولا فكرنا نحوش قرش عشان بكرة ولا جيلي ولا الجيل اللي قبلي من الفنانين وسايبينها على الله.
- أكبر مصيبة جت في الكون السوشيال ميديا وبوظت الدنيا كلها وخلت الناس النهاردة يدخلوا في متاهات.
- اللي بيروجوا شائعات عموني وموتوني وقريت من شهر خبر نزلوا لي صورة وبيقولوا إني اتعميت ودخلت مصحة نفسية.. وكده حرام وعندنا أبناء بيخافوا ويقلقوا علينا.
- متجوزتش تاني لأني بحب ولادي قوي، ولا يمكن كنت أضرهم أو أؤذيهم أو أدخل حد يؤذيهم.
- الولد بيغير على أمه جدًا، ومقدرش أبدًا أخليهم يحسوا إن فيه راجل غريب داخل البيت، أولادي هم حياتي، وهم عيني وقلبي.
