طارق عبد العزيز في آخر لقاء قبل رحيله: اشتغلت مندوب كهرباء قبل دخولي الفن.. وفيلم أصحاب ولا بيزنيس بيدعم القضية الفلسطينية
كشف الفنان الراحل طارق عبد العزيز، بـ آخر لقائ تلفزيوني له قبل رحيله، عن تفاصيل عمله قبل دخول الوسط الفني، بجانب حديثه عن أشهر أفلامه أصحاب ولا بيزنيس، وعلاقته بالفنان الراحل خالد صالح وعامر منيب.
وقال طارق عبد العزيز في لقائه الأخير قبل وفاته مع الإعلامي عمرو الليثي، في برنامجه واحد من الناس: أنا اشتغلت محامي يوم واحد ومقدرتش، شوفت المحكمة لاقيت عالم آخر مستخبي جوا مصر العظيمة، واشتغلت حاجات تانية زي مندوب مبيعات في سوق الكهرباء، وواحد اتمرمط وبيشوف من أول العامل لغاية أصحاب الأعمال الكبار، ويجوز ده كانت ميزة إني أشبع من خبرات الحياة من خلال خبرات الحياة مع المجتمع المصري والشعب المصري.
وتابع طارق عبد العزيز: لما بلاقي أن حقي هيجي بـ أذية الآخر بـ أفوض أمري لله، ولما بتيجي أذية أنا بخاف، المنتجين الفنيين بيتعاملوا معايا على إني غاوي مش محترف، وبيكتشفوا إني راجل طيب ومعجب بالعمل، وبيمارسوا عليا ضغوط إني آخد ربع أجري.
طارق عبد العزيز: أصحاب ولا بيزنيس بيدعم القضية الفلسطينية
وأكد طارق عبد العزيز، أن فيلمه الشهير أصحاب ولا بيزنيس دعم القضية الفلسطينية، قائلًا: فيلم أصحاب ولا بيزنيس كانت ذكريات جميلة بالنسبة لي، ودوري في الفيلم كان طويل وصعب، كانوا 80 مشهد ليا، واشتغلت قبل العمل بـ 4 أيام، وهو من الأفلام اللي أنا بحبها لأن الفيلم كان يحتوي على رسالة ودعم للقضية الفلسطينية، والصداقة.
طارق عبد العزيز: خالد صالح أخويا وصاحب فضل
أما عن علاقته بالراحلين خالد صالح وعامر منيب، فعلق طارق عبد العزيز: خالد صالح كان سند وأخويا، يمكن ربنا عوضني بـ أخويا وحبيبي محمد رياض نفس التركيبة ونفس الدماغ، لكن خالد ما في كلمة حلوة هتذكر إلا لما تذكر، ربنا يبارك في أحمد وعلياء ويوفقهم، وأنا مبسوط أن أحمد خطوات كلها بينتقيها.
وأضاف: خالد صالح كان له فضل إنه قدمني ورشحني للمخرجة أنعام محمد علي في مسلسل أم كلثوم، وهنيدي كان له فضل لأنه أخذني في أول فيلم يعمله من بطولته صعيدي في الجامعة الأمريكية وعملت مشهد واحد، وعملت بعده مع هنيدي همام في أمستردام.
وأردف طارق عبد العزيز: مفيش حد مرضاهوش عامر، جبر الخاطر عنده كان مهم بشكل غير عادي، عامر كان حالة خاصة، عندي أصحاب كتير جدًا وعندي أصدقاء خارج الوسط الفني، وكل اللي قريبين مني بيبقوا قريبين بدرجة أنتيم ومبنخبيش حاجة على بعض.
