حنان مطاوع: أنا متضامنة مع فلسطين لكن عمري ما هوقف شغلي.. ومحتاجين نتوب عن أخطائنا مش الفن
علقت الفنانة حنان مطاوع، على توقف بعض الفنانين عن استكمال تصوير أعمالهم الفنية؛ تضامنًا مع القضية الفلسطينية، وما يحدث بغزة من مجازر وإبادات جماعية، من قِبل إسرائيل.
وقالت حنان مطاوع خلال حوارها مع القاهرة 24: في كتير من الناس مش بيحترموا الفن وكتير من الفنانين مش شايفين إنهم بيعملوا شيء عظيم، مش شايفين أهمية الفن، أنا متضامنة مع غزة من وأنا صغيرة وكنت في الجامعة بمشي في مظاهرات وكنت عايزة أطلع قوافل، ومرة أمي جابتني من دماغي وقالتلي لما تتمي سن الرشد وتبقي سليمة، عشان أنا عندي ديسك في ضهري، ومتبقيش عالة على الناس ويمرضوكي بدل ما يمرضوا الجرحى، وتبقي فلوسك مع نفسك.
حنان مطاوع: أنا متضامنة مع غزة من صغري.. ومش هوقف شغلي عشانهم
وتابعت حنان مطاوع: لكن عمري ما تخيلت إني ممكن أوقف شغلي عشان غزة، أنا متضامنة معاهم بس هفضل أشتغل الفنان ده بيثير وجدان أمة ووعيهم، الفنان بسمة وشئ عظيم، حتى الحضارات بيتم تخليدها بالفن، زي الحضارة الفرعونية، وصلتلنا من خلال الرسومات، فالفن شئ عظيم جدا، بس هو شقين، ولازم إنتي كفنانة تبقي مقتنعة باللي بتعمليه ومؤمنة به حتى لو كان كوميدي أو استعراضي.
وأردفت حنان مطاوع: زي فيلم مولد يا دنيا إخراج أستاذ حسين كمال، عبارة عن راجل عايز يكوّن فرقة من النشالين، فمن خلال الفن بيتحولوا من حرامية ونشالين إلى ناس ذو حيثية في المجتمع، يعني مش لازم تقول شعارات عشان أبقى بعمل حاجة عظيمة.
وأضافت حنان مطاوع، مؤكدةً على أن هدف الفن ليس الترفيه فقط، قائلةً: الفن مش بس أداة للترفيه، وحتى لو للترفيه، إزاي نسخف منه، ده النبي صلى الله عليه وسلم بيقول تبسمك في وجه أخيك صدقة، إنك تدخل السرور على قلب أخيك، بيستهينوا بإنك ممكن تسعد إنسان أو تحط عليه ابتسامة، ده إحنا بناخد عليها صدقة.
حنان مطاوع: محتاجين نتوب عن أخطائنا مش عن الفن
واختتمت حنان مطاوع حديثها: كلنا محتاجين إننا نتوب عن أخطائنا كبشر، بس مش عن الفن، والفن مهنة شديدة الخصوصية، لأنها بتلعب على أوتار الوجدان والعقل، عشان كدة الصهاينة حسبي الله ونعم الوكيل فيهم لما بيحبوا يهيمنوا على أمة، بيدخلوا على حتتين، الإعلام والفنون، وبيقلبوا الحقائق ويعملوا فيلم يعيطوا فيه الناس على قضيتهم هما، هما مدركين بأهمية الفن والإعلام والكلمة.
