عمرو سلامة: إنتاج أي فيلم هو صدفة كونية.. وفي دماغي 10 أفلام أكشن عايز أنفذها
قال المخرج عمرو سلامة، إنه ينظر حاليًا للسينما على إنها غاية وليس وسيلة، موضحًا أن آخر أفلامه شماريخ لا يحمل رسائل معينة، سوى هدف فريق العمل استمتاع الجمهور بالفيلم فقط.
وقال عمرو سلامة خلال تصريحاته بالمؤتمر الصحفي على هامش مهرجان البحر الأحمر بجدة: من بداياتي كنت باصص للسينما إنها وسيلة لتوصيل رسائل معينة، وبعد أول أو تاني فيلم ليا بقيت أقاوم الشئ اللي جوايا اللي عايز يعلم الناس حاجة أو يغير فكرهم، فحاولت أفهم إن السينما هي غاية في حد ذاتها مش وسيلة لغاية تانية.
عمرو سلامة: مفيش رسائل معينة من فيلم شماريخ
وتابع عمرو سلامة: وحتى آخر أفلامي شماريخ، حاسس إن الرسالة الوحيدة اللي عايز أقولها للناس إن ادخلوا الفيلم تاني لوعجبكم، مفيش أي رسالة تانية عايز أوصلها، مجرد رحلة ادخلوها واتبسطوا.
وأضاف عمرو سلامة: حتى لما كنت بعمل أكتر فيلم يصنف فني، زي فيلم أسماء، كان الهدف منه هو مداعبة الجمهور، عايز أبسطه وأخليه يتأثر، ويدخل رحلة ويخرج منها وهو متفاعل معاها، وفيلم زي أسماء كان له جمهور معين، وشماريخ نوع جمهور آخر، فأنا بعمل حاجة عايز الجمهور يتفاعل معاها، حتى لو شتم بس يتفاعل.
عمرو سلامة: إنتاج أي فيلم هو صدفة كونية
واختتم عمرو سلامة حديثه، مشيرًا إلى إنه يريد تقديم جميع أنواع الأعمال الفنية، وليس حاصر نفسه في نوعية معينة، قائلًا: لو عليا أعمل كل الأنواع أعمل ميوزيكال ورعب وكله، وفي فرق بين الأفلام اللي أنا عايز أعملها وبين الأفلام اللي أُتيح ليا إني أعملها، والفيلم عشان يتصنع محتاج عوامل كتير مع بعض، ودايما بقول إن إنتاج أي فيلم هو صدفة كونية، وإنه يطلع فيلم حلو دي صدفة أكبر، وعندي في دماغي مش أقل من 10 أفلام أكشن عايز أعملهم.
