أحمد شاهين: لم أتردد في قبول دوري بمسلسل صوت وصورة.. ونجاحه فكرني بنجاح بـ 100 وش
أحمد شاهين لـ القاهرة 24: غيرت 4 بدل في صوت وصورة عشان مستوى الشخصية الاجتماعي يبان
كشف الفنان أحمد شاهين، كواليس مشاركته في مسلسل صوت وصورة بطولة الفنانة حنان مطاوع، والذي عُرض خلال الفترة الماضية وحقق نجاحًا كبيرًا.
وقال أحمد شاهين، في تصريح خاص لـ القاهرة 24: ترشيحي للدور جاء عن طريق المساعد الأول الأستاذ ضياء حبيب، وهو مخرج الوحدة الأولى في مسلسل صوت وصورة، “ولما جالي الورق ماترددتش لحظة في قبول الدور، خاصة مع وجود عوامل النجاح زي شركة الإنتاج والمخرج محمود عبد التواب، وأستاذ محمد سليمان عبد المالك”.
وعن تحضيراته لشخصية المحامي خلال أحداث مسلسل صوت وصورة، فعلق أحمد شاهين: “أنا بحب لما يجيلي دور أعمله بشكل مختلف، يعني أنا عملت دور دكتور 3 مرات وكل مرة الدور مختلف عن اللي قبله، والجمهور متعود إني بقدم الشخصية بيكون فيها لايت كوميدي علشان أسيب بصمة مع الجمهور، وعلشان شخصيتي في مسلسل صوت وصورة محامي، فكان لازم أعرف مصطلحات فقعدت مع محامي لغاية ما عملت تاريخ للشخصية، والناس خدت بالها من فكرة التبديل بين 4 بدل طوال المسلسل علشان يبان أن مستوى الشخصية الاجتماعي قليل شوية”.
وأضاف أحمد شاهين: "مبسوط جدًا إن الناس بتوقفني في الشارع وتنادي ليا بـ اسم الشخصية وده نجاح كبير جدًا زي ما حصل معايا في مسلسل بـ 100 وش، ونجاح مسلسل صوت وصورة بيفكرني بنجاح مسلسل بـ 100 وش، لأن المقياس المهم بالنسبة ليا هو الشارع.
مسلسل صوت وصورة
شارك في مسلسل صوت وصورة كل من حنان مطاوع، صدقي صخر، عمرو وهبة، ناردين فرج، مراد مكرم، وليد فواز، نجلاء بدر، فدوى عابد ومن تأليف محمد سليمان عبد المالك، وإخراج محمود عبد التواب.
