نورين شحاتة تناقش ظاهرة الإضراب عن الزواج في البيه والهانم | فيديو
ناقشت الإعلامية نورين شحاتة والإعلامي ممدوح الشناوي، في حلقة اليوم من برنامجهما البيه والهانم المذاع عبر قناة القاهرة والناس، ظاهرة الإضراب أو العزوف عن الزواج والتي أصبحت منتشرة في عقول الكثير من الفتيات والشباب مؤخرًا.
من ناحيتها، قالت نورين شحاتة متسائلة: هو ينفع حد يعيش لوحده؟ لأن دايمًا فيه مشكلة بين الست والراجل منذ الأزل لأنهم ما يقدروش يستغنوا عن بعض، لكن في نفس الوقت طباعهم مختلفة عن بعض ومش عارفين يفهموا بعض، وفكرة أنهم يعيشوا من غير بعض خالص ده شيء عكس الطبيعة.
بدوره رد ممدوح الشناوي عارضًا وجهة نظره: ده مش عكس الطبيعة، لأن مؤخرًا في موضة طلعت وهي الإضراب عن الزواج، والشباب بيقول عندنا ظروف ومشاكل ونفسيا غير مؤهل وممكن أعرف أربي حيوان اليف أو أسد لكن مش هعرف أروض أنثى، وبالتالي هما شايفين من وجهة نظرهم كالمضربين عن الزواج مش هقدر أتجوز ومش قادر استحمل ودي فكرة حلوة أوي وعجبتني، والمضرب بيواجه مجتمع هو شايف من وجهة نظره حاجات مش حلوة فيه.
واستنكرت نورين شحاتة حديث ممدوح الشناوي وعارضته قائلة: في حاجة اسمها نروض أنثى، الست شريكة حياتك يعني هتعيش معاك العمر كله وهتخلف ولاد، لو تعبان هتكون في ظهرك ولو حصل مشكلة في فلوسك هتقف معاك، وبتشتغل زيها زيك ينفع تروضها! أنت هتعيش معاها حياتك.
فيما أكد ممدوح الشناوي أن الرجل أيضًا يقوم بدور كبير في الحياة الزوجية وتجاه زوجته موضحًا: مش إحنا بس المضريبين فيه ستات مضربين، ولو أنتم بتربوا وأنتم مدرسة، إحنا بنجري في ساقية كل يوم وبنشتغل بنشوف المرين علشان نأمن لكم مستقبلكم، بنسمع وبنحتوي وبنخلي بالنا، وإحنا السند والأمان والظهر والحماية وكل حاجة، ولكن بناقش الموضوع والست والرجل الاتنين طرف فيه، وبالنسبة لي بشوف أن تفكير الراجل المضرب عن الزواج تفكيره صح.
من ناحيتها، قالت نورين شحاتة: إضراب الست عن الزواج حاجة غريبة جدًا، لأن دايما الست بتحب يكون عندها سند وراجل سواء ابن أو أخ أو شريك حياة ليها ولكن من وجهة نظري السبب اللي بيضرب فيه الرجل عن الزواج مختلف عن السبب اللي بتضرب في الست عن الزواج.
برنامج البيه والهانم
جدير بالذكر، أن برنامج البيه والهانم، تقدمه الإعلامية نورين شحاتة والإعلامي ممدوح الشناوي، وهو برنامج اجتماعي يتناول موضوعات مهمة خاصة بالمرأة والرجل، وخلال الحلقات يتم استضافة مجموعة من نجوم الفن على مدار الحلقات، والبرنامج من إنتاج شركة ريكورد ميديا، ويعرض من الأحد حتى الأربعاء في الساعة السادسة مساء.
