الغراب وخراب عِشه
بحب الحيوانات بشكل عام بس عندي احترام كبير وقديم للنسر وبشوفه من أقوى الكائنات الحية.. مش القوة الجسدية ولا القتالية بس لكن كمان من ناحية الكبرياء والكرامة وعزة النفس والترفع.. الحقيقة إن بيشاركه عندي في المكانة دي كمان الحصان اللي فيه نفس المميزات.
بشوف إن التأمل في عالم الحيوانات بيكون أهم دليل ليك في حياتك أنت البشرية العادية.. طبعًا أوُمال!.. ما هو الحيوان لو ماكانتش حياته تنفع دليل ليك أنت كإنسان ماكنش ربنا هيذكره في القرآن أكتر من مرة وموقف وقصة كان هو البطل والمعلم فيهم!.. هدهد ونملة سيدنا سليمان.. ناقة سيدنا صالح.. حوت سيدنا يونس.. كلب أهل الكهف.. غراب قابيل وهابيل.. القطة اللي دخلت ست النار، والكلب اللي دخل راجل الجنة.. بقرة قوم موسى، وغيرهم كتير.
دي مقدمة كانت مهمة للي جاي.. نرجع للنسر.. النسر واخد وضعه وسط باقي الكائنات وخصوصًا الطيور.. لكن الغريب إن الغراب هو الكائن الوحيد اللي مش بيكون عايز يشوف مكانة النسر في حجمها الطبيعي وبيصمم ينكشه!.. من أغرب الظواهر في عالم الحيوان واللي مالهاش تفسير منطقي إن طائر الغراب من وقت للتاني تلاقي حد منه قرر يتجنن ويروح يقف فوق ضهر النسر وينقره في رقبته!.. بغض النظر إن نقرات الغراب مش هتقتل النسر لكنه بيبقى تصرف غير مفهوم بصراحة.. طب أنت عايز تقتله؟، يعني لو حصلت معجزة ونقراتك دي قتلته هل لما يقع هتاكله؟.. لأ أنا مش باكل لحم نسور.. طب عايز تعوره؟.. مش عارف.. أوُمال عايز إيه؟.. أهو عايز أرازيه وخلاص.
فاكرين الفنان الجميل الرفيع الأسمر اللي كان في مسرحية "الهمجي" مع الفنان الكبير "محمد صبحي" والمشهد بتاع "ماتقدرش".. يا ابني هضربك؟.. ماتقدرش.. يا ابني شوف عودك وشوف عودي!.. "ماتقدرش".. يا ابني أنت مفيش عندك أمارة للفتونة دي!.. برضه "ماتقدرش".. أهو ده الوصف الأقرب لعلاقة النسر بالغراب.. الغريب أكتر وأكتر هو رد فعل النسر اللي بمجرد ما أي غراب بييجي يقف على ضهره بيتجاهله وبيفرد جناحاته على آخرهم وبيقرر يطير لفوق وهو شايله.. طب ما تهز جسمك كام هزة كده عشان يبعد عنك؟.. لأ.. هو بيسيبه واقف على ضهره وبينقر النقر التافه بتاعه ده وبيروح طاير بيه لفوق.. تمام، طب الغراب بقى بيحس على دمه وينزل؟.. لأ بيكمل غتاتة ويفضل واقف فوق ضهر النسر.
الفكرة إن كل ما الارتفاع زاد كل ما نسبة الأوكسجين بتقل وده وضع مش بيقدر الغراب يتعامل معاه عشان بيتخنق عكس النسر اللي واخد على التعامل مع نقص الأوكسجين فبيقرر الغراب إنه ياخد بعضه وبرفع الراية البيضا وينزل لتحت بعد ارتفاع معين وحفاظًا على حياته وبعد فشل محاولاته الخايبة على نكش كبير الطيور.
• ماتوجعش دماغك ولا تضيع وقتك في محاول إيجاد تفسير لرغبة البعض في التقليل من كل نجاح بتحققه أو خطوة بتاخدها لإنها غيّة ومزاج عند القلوب اللي مش بتحب لك الخير مهما شوفت وشوش أصحابها بتضحك في وشك أو كلامهم نقط عسل في ودانك ومهما شافوا منك كل طيب.. اختار عدوك زي ما بتختار صديقك.. استنضف.. مش أي حد كده ينفع يبقى اسمه مزعلك أو يهز سلامك النفسي ويأثر عليك بالسلب.. ماتدخلش معارك مجانية مع حد مايسواش، لأن كُتر الخناق مع الصغيرين هيصغرك.. خلّي زعلك شرف مش أى حد ينوله.. الأيام لوحدها كفيلة إنها توقع كل اللي صمم يسحبك لتحت.. ترفّع، وركز، وكمل.
