حمزة دياب: مشاركتي في فيلم ستين جنيه فرصة.. وخسيت من أجل الشخصية
تحدث الفنان الشاب حمزة دياب، عن مشاركته في الفيلم القصير ستين جنيه، الذي افتتح الدورة السادسة من مهرجان الجونة السينمائي الدولي، مؤكدا أنها تجربة مهمة في بداية مسيرته الفنية، كما كشف كواليس تحضيراته للشخصية.
وقال حمزة دياب خلال لقائه مع القاهرة 24: تجربة فيلم ستين جنيه أحلى تجربة بالنسبة لي، لأني بحب أجرب حاجات جديدة وإن تجيلي فرصة زي دي وأنا لسه في البداية أقدر أثبت فيها نفسي ومع مخرج خطير، والدور اشتغلت على حاجات كتير، جسديًا ونفسيًا.
حمزة دياب: خسيت اتنين كيلو عشان الشخصية يبقى شكلها ضعيف
وتابع حمزة دياب: جسديًا جهزت نفسي إني أقعد على كرسي متحرك، واتكلمت مع عمرو سلامة إني محتاج أقعد مع حد بيقعد على كرسي متحرك أفهم منه طريقة جسمه وقعدته بتبقى عاملة إزاي وبينام إزاي، وكنت حابب أكون جسديًا أضعف، فخسيت 2 كيلو ومكنش باين في اللبس بس أنا كنت حاسس نفسي أضعف وتعبان وده اللي مطلوب.
عمرو سلامة يتحدث عن فيلم ستين جنيه
وسبق وتحدث المخرج عمرو سلامة عن فيلم ستين جنيه، خلال لقائه مع القاهرة 24، وقال: الفيلم محدد عرضه من قبل أحداث 7 أكتوبر، وجات بالصدفة حصلت الأحداث دي، ومبسوط إن الفيلم كان فيلم الافتتاح، والاحتفاء اللي حصل بالفيلم سعدت بيه جدًا، والفيلم بدأ كأغنية مصورة لزياد ظاظا وتحولت بعد ما سمعت أفكاره وأحاسيسه وهو بيكتب الأغنية لفيلم قصير، ومكنتش محدد مدته قد إيه لحد ما وصل لزمن 18 دقيقة، وردود الأفعال فرحتني جدًا.
