حمو بيكا: مريت بمشاكل بعد سبوع بنتي بسبب الحسد.. ومحدش يطلب فلوس من والدتي
قال مطرب المهرجانات حمو بيكا إنه مر بفترة صعبة بعد سبوع ابنته بسبب الحسد، مشيرًا إلى أن ما قيل بشأن تكلفة السبوع غير صحيح.
وأضاف حمو بيكا في فيديو نشره عبر حسابه بموقع فيس بوك: اتقال إن السبوع اتصرف عليه ملايين وعربية بـ 10 مليون دولار، إزاي دي عربية كانت مخلعة.. الكلام ده مش حقيقي روحوا واسألوا على القاعة بنفسكم، وكل اللي حضروا معلمين ونجوم بيحبوا بيكا، والدنيا كلها بتعمل كده، وأكبر من كده بكتير ولا علشان أنا حمو بيكا.. سيبوا الملك للمالك وقول يا رب وطول ما أنت بتسعى ربنا هيقف جمبك، لكن ما تبقاش نايم في بيتك ننه ولا بابي ومامي بيدوك المصروف وتطلعمهم علينا.
وأكمل حمو بيكا: إحنا مفيش عندنا بابي ومامي، وبنصرف على بيوتنا، وبصرف على 3 و4 بيوت وورايا ناس فاتحة بيوت، وبرضه معايا 23 نفر بياكلوا عيش، وناس عندها عيال وفاتحة ييوت، وشقيت وتعبت لحد دلوقتي.
وتابع حمو بيكا: في إيه يا جماعة من وقت السبوع لدلوقتي كنت في مشاكل شخصية من الحسد، وده مذكور في القرآن، والحمد لله عديت وبنتي الأميرة تاج في حضني وربنا يخليها ليا ولما ربنا يديني هعملها أكتر من كده، علشان أنت بذات نفسك بتشتغل علشان عيالك وتتمنى تجيب لعيالك نجمة من السما.. وأنا لما كنت لوحدي ما كنتش حاسس أني أب، لما جالي بنتي حسيت بمعنى كلمة الأب، ومش عاوزها تشوف اللي شفته؛ لأني عيشت عيشة طيبة وكريمة، وعاوز أأمن لها حياتها ومش دايم غير حب الناس، وأنا بحبكم أكتر شوية من حبكم ليا، وخليك رحيم ما تتكلمش على الناس وسيب الملك للمالك وربنا هيكرمك.
واستكمل حمو بيكا حديثه محذرًا أقاربه: بلاش تتصلوا بوالدتي وتطلبوا منها شيء علشان هي معهاش حاجة تديها ليكم، والمرة دي بقول القرايب والمرة الجاية هذكركم بالاسم، مش لاقي تاكل أو مش معاك مش ذنبي يا قلبي، أنا كنت بشتغل وباخد 15 جنيه ومرتبي في الأسبوع كله 120 جنيه، وما قلتش أديني وأنت كنت معاك ومرتاح وأنا كنت قاعد في أوضة وصالة.
واختتم حمو بيكا: الناس اتكلمت على الرسول مش هتتكلم على العبد لله، وفيه ناس كتير عندهم صفار ومش قادر أوصفه، ولو مش لاقي تاكل اشتغل يا بابا أو يا ماما بدال ما بتطلبي ببجاحة وبتشحتي ببجاحة، وما تبقاش نايم في بيتك واشتغل.. أنا بدي لحد يستاهل ولبيتي أو أخواتي أديك أنت بتاع إيه، وفي شغلتنا لو شوية تعب جهم هنام، ومفيش حاجة بتدخلنا تاني.
