أحمد المرسي: أنا ومروان حامد زملاء دراسة.. وفيلم كيرة والجن كان صعب جدا | فيديو
تحدث مدير التصوير أحمد المرسي، عن حضوره مهرجان الجونة السينمائي في دورته السادسة، مشيرًا إلى أن الفن منوط بالتعبير عن أزمات الجمهور، وله دور هام، كما أشاد بالمخرج مروان حامد الذي يعتبره رفيق مشواره منذ الدراسة.
وقال أحمد المرسي خلال لقائه مع القاهرة 24: بهتم جدا بحضور مهرجان الجونة وبشوف إن القائمين عليه جادين جدا فيه ودايما بيستوعب الأحداث اللي بتحصل، فـ الدورة دي الاستثنائية وأنا مبسوط منها جدا، وبشكر فريق المهرجان، ومع احترام الوضع الحالي، أنا بشوف إن ده دور الفن في الأزمات، إنه يعبر عن الناس ومن خلال الأفلام، فده دورنا إننا نعبر عن اللي بيحصل في العالم.
أحمد المرسي: فيلم كيرة والجن مكنش فيه حاجة سهلة
وتابع أحمد المرسي: فيلم كيرة وجن مكنش فيه حاجة سهلة خالص، خدنا وقت طويل جدا في التصوير وفي تنفيذه، وده بيكون حمل كبير علينا، وهو فيلم تاريخي، فترة معشنهاش فكان في صعوبة في البحث الشديد والدقة اللي بنقدم بيها، وكنا عايزين يكون في تجديد في الفيلم وإن يكون له شخصيته.
أحمد المرسي: أنا ومروان حامد زملاء دراسة.. وتشاركنا الطموح والنجاح
ولفت أحمد المرسي إلى علاقته بالمخرج مروان حامد، الذي عمل معه في أكثر من فيلم، قائلا: علاقتي بمروان حامد علاقة قديمة إحنا زملاء دراسة، وشاركنا بعض في الطموح ثم في النجاح، وأنا بحترمه على مستوى الفن والمستوى الشخصي، وهو دايما متطور ومتنوع مفيش فيلم عنده شبه التاني، وأي مخرج اشتغلت معاه أحب اشتغل معاه تاني، أنا عموما بنتقي أوي الناس اللي بشتغل معاهم.
فيلم كيرة والجن
وفي سياق مختلف، عرض فيلم كيرة والجن في عام 2022، وضم العديد من الفنانين، أبرزهم الفنان كريم عبد العزيز، أحمد عز، هند صبري، وغيرهم، والعمل من إخراج مروان حامد.
