بدور على عروسة مثالية.. كريم قاسم: حذر جدًا في اختيار شريكة الحياة وأهلي مش بيضغطوا عليا
كشف الفنان كريم قاسم، عن سبب تأخره في اتخاذ خطوة الارتباط والزواج، مشيرًا إلى أنه حذر جدًا في اختيار شريكة الحياة لأن خطوة الزواج ليسة سهلة والحياة بشكل عام أصبحت صعبة.
وقال كريم قاسم: أهلي مش بيضغطوا عليا خالص في موضوع الجواز، وبحمد ربنا إنهم مش بيعملوا كده، وأنا مش مرعوب من الجواز، ولكن حذر جدا وأنا بفكر في اختيار الشريك، وبحاول أتعلم من التجارب اللي حواليا، لإن الجواز مش سهل والحياة عامة مش سهلة، مضيفًا: أكيد بتأثر بالقصص اللي بتحصل حواليا، وأتمنى الواحد ياخد الخطوة دي واللي يحصل يحصل.
وأضاف كريم قاسم: بدور على عروسة مثالية ولكن مفيش حد مثالي في الحياة، فبدور على مجموعة من الصفات تكون موجودة.
كما تحدث كريم قاسم عن مشاركته الفنانة إنجي أبو السعود في مسلسل زينهم والعلاقة التي تجمعه بها في العمل، قائلًا: شخصية يمنى موجود منها كتير في الحياة لإنها بتفكر بشكل عملي، وطبعا أكيد متعبة، ولكن جيمي في المسلسل معجب بفكرة إنها شخص عملي واللي في قلبها على لسانها، وأنا بحس أن معظم الستات عندهم حتة عملية، وهيبدأ يظهر في الحلقات المقبلة مشاعر الغيرة على جيمي وفكرة إنه حاسس بعد كفاييته، وهو فعلًا محتاج يتلحلح ويصيع.
