الشوارع كانت بتقف بسببه.. طارق الجنايني عن مشاركة كزبرة بالحريفة: موهوب جدًا وعنده قاعدة جماهيرية كبيرة
تحدث المنتج طارق الجنايني عن فيلمه الحريفة الذي يشارك فيه مجموعة من النجوم الشباب منهم الفنان نور النبوي ومطرب المهرجانات كزبرة.
وقال طارق الجنايني في لقاء تلفزيوني: فيلم الحريفة شبه الأفلام اللي كبرت بحبها، وصورنا في أماكن حقيقية زي المدارس والملاعب وده بيخلي الصورة نفسها شكلها مختلف عن أي حاجة تانية.
وأضاف عن مشاركة كزبرة في الفيلم: كزبرة بدأ مغني ولكن في رأيي هيكون ممثل لأنه موهوب جدا، وعنده تفاني في شغله مش عادي وقاعدة جماهيرية كبيرة لدرجة، وإحنا بنصور الشوارع كانت بتقف من كتر ما الناس بيحبوه وعاوزين يتصورا معاه وهو محترم ومؤدب وبتاع شغل.
من ناحيته، تحدث الفنان نور النبوي عن مشاركته في الفيلم، قائلًا: مشاركتي في الفيلم خطوة كبيرة ومهمة ومتشرف أني جزء منها ومبسوط أني بعمل فيلم سينما ودور كبير في الفيلم، وتلات شهور بنتمرن كورة، وأنا أصلًا كنت بلعب كورة بسيط وقعدت 3 شهور أتمرن و3 شهور بعمل بروفات، وأتمنى تشوفوا مستوى حلو، وكواليس الفيلم شبابية لأن كلهم شباب.
وأضاف نور النبوي: سعيد بالعمل مع أحمد غزي وكزبرة وسليم الترك وخالد الذهبي لأنهم شباب ونجوم كبار وكنا صحاب وبنخرج وكل يوم نتقابل نتشغل على الاسكريبت حتى لو مفيش تصوير، ومتشرف أني بشتغل مع طارق كل حاجة منظمة ومعمولة مظبوطة.
