أوبر اشترت ديدي.. حيلة جديدة للاختراق والنصب على العملاء من خلال إرسال كود
زعمت سيدة تدعى هند الأشعل، تعرض بياناتها للاختراق من خلال حيلة جديدة غير مألوفة، عندما طلبت سيارة من على تطبيق ديدي، وتواصل معها مجهول على أنه السائق، أخبرها أن تطبيق أوبر اشترى ديدي.
وقالت الأشعل خلال حديثها مع القاهرة 24، إنها طلبت رحلة من على تطبيق ديدي، فهاتفها أحدهم من رقم أرفقته خلال منشور على موقع فيسبوك، وادعى أنه كابتن الرحلة، ولكن هناك كود سيتم إرساله لها.
تطبيق ديدي
وأضافت الأشعل: قالي أوبر اشترت ديدي فلازم أبعتله الكود اللي هيجيلي، وكان مبعوت كود بالفعل على رقمي والإيميل، فقولتله الكود ولكن في نفس اللحظة اكتشفت إن ديدي لغت الرحلة من فترة أصلا، فدخلت على أوبر وغيرت الباسورد بسرعة.
وتابعت الأشعل: المفروض بيانات العملاء تكون سرية، إزاي في شخص قدر يوصلها؟
وفي منشور هند الأشعل التي استغاثت به عبر موقع التواصل الاجتماعي فيسبوك، ادعت: أنا كنت طالبة رحلة في ديدي.. واتصل بيا الرقم ده.. وقالي إن أوبر اشترت ديدي، وفي نظام جديد إنهم بيبعتوا كود للعملاء للتأكيد.
وأكملت هند: لقيت كودين مبعوتين، واحد على رقم تليفوني والتاني على الإيميل، فإزاي حد يعرف بيانات العملاء؟ لولا ستر ربنا إني بعد ما قلت له الكود، لقيته لاغي الرحلة على ديدي.
وواصلت: تداركت الأمر بسرعة ودخلت غيرت الباسورد كان معرفش عمل إيه.
حيلة جديدة للاختراق عن طريق ديدي
وفي وقت سابق، نشرت سيدة تدعى شيماء خميس، عبر صفحتها الشخصية على موقع فيسبوك، أنها تعرضت لنفس الطريقة لاختراق بياناتها، بعدما استعانت بتطبيق ديدي لطلب رحلتها المعتادة، وهاتفها كابتن ديدي قائلًا: فيه كود جالك من أوبر قوليهولي عشان أحدد اللوكيشن بتاعك.
وكتبت شيماء: رديت عليه إني طالبة ديدي مش أوبر، قالي أوبر اشترت ديدي وده التحديث الجديد، قولتله أنا لسه راكباه النهاردة ومكنش فيه كده قالي ده لسه من ساعة، ووصلتني في نفس اللحظة رسالة sms من أوبر فيها كود، وحسيت إن مخي وقف واديته الكود فعلا.. وقفل عشان يجيلي وبعد ثواني كنسل الرحلة.
وتابعت خميس: حاجة فكرتني إني كنت عاملة الرحلة فيزا بكارت الحساب البنكي بتاعي، دخلت بسرعة حولت كل الرصيد لفيزا المرتب وسيبت بس ٥٠ج للرحلة اللي الأبليكيشن طلبها أتوماتيك بعد ما النصاب ده كنسل، وبعد ريبورتات لديدي وأوبر كلموني فريق الأمان في ديدي، وبلغوني إنها طريقة جديدة للنصب بيهكروا الأكونت بتاع تطبيقات التوصيل، سواء أوبر أو كريم أو ديدي، وبعد ما يسرق الأكونت بتاعي على أوبر مثلا بيعمل رحلات وهمية منه تتخصم من كارت البنك بتاعي اللي متسجل على التطبيق وتتسحب منه.
