محمود العسيلي: اتجوزت 3 مرات عشان الاستقرار ويكون معايا رفيقة الحياة
كشف المطرب محمود العسيلي، سبب زواجه ثلاث مرات حتى الآن، مؤكدًًا أنه يبحث عن الاستقرار مع رفيقته في الحياة.
وقال محمود العسيلي في تصريحات تلفزيونية، إنه لا يحب العلاقات الزوجية التقليدية، ويفضل الابتعاد والانفصال إذا كان هناك طرف في العلاقة غير سعيد فيها، موضحًا: بحاول أعيش مبسوط ومرتاح وفيه ناس بتفضل دايسة على نفسها في العلاقات الزوجية والشخصية.
وأضاف محمود العسيلي: تعلمت أهم حاجة يكون الإنسان مرتاح ومبسوط ولو ده متحققش ليه ندوس على نفسنا، أنا مش بعرف أعيش الحياة التقليدية يعنى لو مضايق بحاول أصلح العلاقة ولو إحنا الاثنين مش مبسوطين يبقى أحسن قرار منكملش والعمر قصير، وأنا حاليا متجوز والاستقرار حلو واتجوزت 3 مرات عشان عايز الاستقرار والعيلة ويكون معايا رفيقة في الحياة.
وأكمل العسيلي: فيه ناس بتفضل تمثل على بعض في الجواز وأفضل حاجة نكون على طبيعتنا ولو الدنيا مش ماشية بيكون أفضل شيء البعد، والانفصال في المرتين أنا اللي قررت البعد ولما أفقد الأمل في إصلاح العلاقة بختار الابتعاد.
محمود العسيلي: موضة المهرجانات اتغيرت ونجاح حمو بيكا وشاكوش وعمر كمال انخفض
وأكد الفنان محمود العسيلي، أن تراجع مطربي المهرجانات سببه تغير الموضة أو الترند ناحية التراب، قائلا: الدنيا بتتغير المهرجانات كانت موضة والترند بيتغير مع الوقت وجت لهم فترة كانوا الحاجة المناسبة للذوق العام ودلوقتي اختفوا شوية عشان مش بيجددوا وبقى التراب هو الترند ومكسر الدنيا.
وأشار محمود العسيلي، إلى أن عصام صاصا واحد من أكثر المطربين استماعا على جميع المنصات وهو الأكثر استماعا في كل المنصات واليوتيوب من الجميع في الوطن العربي، موضحا أن الأكثر استماعا مع الجيل الصغير الآن هو التراب وسيأتي وقت عليه ويختفي لأنه مبني على موضة غير ناس قليلة عندهم شكل ثابت ويطوروا.
وتابع: حمو بيكا وعمر كمال وشاكوش موجودين ونجاحهم كان كبير ودلوقتي بينجحوا في حاجات وحاجات لا ومبقوش زي الأول وبيبقى ظواهر، والشاطر هو اللي يتحول ميبقاش ظاهرة ويكون له شكل خاص به ويكون فنان له لون وشكل بس معظم مطربي المهرجانات مش بيعملوا كده.
