محمود الليثي وعمر كمال: وقفنا شغلنا شهرين تضامنًا مع غزة.. وإحنا أكتر شعب مهتم بالقضية وشايل همها
حل المطربان محمود الليثي وعمر كمال ضيفين في ندوة بموقع القاهرة 24، وتحدثا عن أغنيتهما الجديدة أخوك يشرف بجد، مؤكدين أنهما أجلا طرحها تضامنًا مع غزة.
وقال محمود الليثي: وقفنا شغلنا شهرين كاملين تضامنًا مع غزة، ولما عملوا الهدنة بدأنا نرجع نشتغل، وأغنيتنا الجديدة أنا وعمر كمال متسجلة من شهرين أو تلاتة، ووقفنا اللايفات اللي كنا بنعملها كل يوم، وكنا متكافتين معاهم وما عملناش احتفاليات لأننا عاوزين نحافظ على مشاعرهم.
من ناحيته رد عمر كمال: ربنا يلطف بيهم إحنا أكتر شعب مهتم بالقضية دي وشايل همها.
وكشف محمود الليثي وعمر كمال، سبب تغيير مقاطع من الأغنية، موضحين أنهما التزاما بقرارات الفنان مصطفى كامل نقيب المهن الموسيقية، والأغنية كانت تحمل شعارات وهو ما ترفضه النقابة في قرارتها الجديدة.
وبيّن محمود الليثي وعمر كمال: كنا قايلين شعارات في الأغنية، زي نهدى ونتوب شفونا بالشقلوب، واللي يسألك إحنا مين قول له إحنا قاعدين ومكملين.
كما أضاف محمود الليثي: مصطفى كامل قال نبطل شعارات واتفقنا على كده فلقيت الغنوة فيها شعارات، وعلى الرغم من أن الكليب اتعمل على كده، ولكن غيرنا فيه احتراما لنقابة المهن الموسيقية لأن مصطفى كامل مش عاوز طريقة الأداء والغناء دي، وقال دي مخالفة للذوق العام.
وطرح عمر كمال ومحمود الليثي أغنية أخوك يشرف بلد وهي من كلمات مصطفى الجن، ألحان علاء غنيم، وتوزيع إسلام شيبسي، والأغنية من فيلم حمص وحلاوة، المقرر طرحه الفترة المقبلة في دور العرض السينمائي.
