إزاي نطلع أمهات للمستقبل؟.. نورين شحاتة تطرح الآراء حول تربية الفتيات مع عصر السوشيال ميديا |فيديو
ناقشت الإعلامية نورين شحاتة في برنامجها البيه والهانم، الذي تقدمه مع الإعلامي ممدوح الشناوي، كيفية تربية الفتيات ما بين الانفتاح والشدة، مع عصر التكنولوجيا والسوشيال ميديا والانفتاح الكبير الذي يشهده المجتمع، عبر قناة القاهرة والناس.
واستضافت نورين شحاتة في البيه والهانم، سيدة تروي تجربتها في تربية ابنتها مع ترك الحرية لها، وسيدة أخرى تروي تجربتها في تربية ابنتها ولكن من خلال الخوف الشديد عليها وبالرجوع إلى العادات والتقاليد التي تربت عليها.
وقالت نورين شحاتة: مش عارفة ليه في موضوع تربية البنات حسيت أن فيه تحيز، ويمكن لأن فيه اختلاف بين شخصية الراجل والست، فكمان فيه اختلاف بين تربية البنات والولاد، ولذلك قلنا لازم يكون فيه حلقة مخصوص لنص المجتمع وإزاي نعرف نربي البنت اللي هتبقى أم وزوجة.
وأضافت نورين شحاتة: التطور اللي بيشوفه الجيل الحالي أصبح مخيف جدا، خاصة في فترة المراهقة، لأنها فترة مهمة واللي بتتحول فيها البنت من طفلة لمراهقة، لا هي طفلة ولا سيدة، وعقليتها مش عارفة تستوعب التغيير اللي حاصل لها، وفي نفس الوقت هي مرحلة صعبة جدًا لأن لو معرفناش نربي البنت والولد في الفترة دي مش هنعرف في الفترة اللي بعدها نحط قواعد وأسس نكمل فيها، فإزاي نقدر نجاري التطور اللي بيحصل في نفس الوقت نربي جيل زي ما طلعنا، وإزاي نطلعهم أمهات ونطلع جيل للمستقبل والدنيا زمان كانت أبسط وما كانش فيه إنترنت ولا سشويال ميديا ولذلك التربية حاليًا بقيت أصعب وأصعب.
من ناحيته قال ممدوح الشناوي: هنتكلم النهارده عن المراهقات اللي دماغهم من السوشيال ميديا مش زينا ومش زي عادتنا وتقاليدنا اللي اتربينا عليها وأسلوبنا اللي طلعنا لقينا أهالينا بيعملوه، وطبيعي يحصل تطورات، بس الجيل الجديد متطور بشكل مخيف جدًا، وخلينا متفقين إننا ما ينفعش نترك أطفالنا للسوشيال ميديا وأتركهم للحياة ونقول لهم أنتم صوتكم من دماغكم اعملوا اللي أنتم عاوزينه وده رأي البعض، ولكن في رأي بيقول ما ينفعش نترك أطفالنا ولازم نرجع لعادتنا وتقاليدينا ونقفل عليهم علشان الدنيا بقت مخيفة.
