أبرز تصريحات سامح الصريطي وزوجته حنان: اتقدمتلها ببقدونس
حل الفنان سامح الصريطي وزوجته المطربة حنان، ضيفين على الفنانة والإعلامية إسعاد يونس، في برنامج صاحبة السعادة، وخلال اللقاء، كشف الصريطي تفاصيل زواجه من حنان، وهي الزيجة التي فاجأ بها الفنان جمهوره، حيث أكد أنه قرر الزواج منها، بعد أن رأى أن هناك أشياء مشتركة بينهما، بجانب إعجابه بها من المقابلة الأولى التي جمعتهما.
ونستعرض لكم في هذا التقرير أبرز تصريحات سامح الصريطي وزوجته خلال اللقاء:
ـ لما زرت حنان في بيتها مكنتش راسم على جواز بس لقيتها فرصة مناسبة في وجود ابنها هشام.
ـ أخدت معايا بقدونس كإشارة على الاهتمام لأنها بتحبه.
ـ سافرت ألمانيا بعدها وبدأت أكلم حنان كأني مقلتلهاش حاجة لكن حسيت من إجاباتها بموافقتها على الزواج.
ـ حنان قالت لي إنها موافقة لكن عندها شرط واحد إن أولادها وأولادي يوافقوا.
تصريحات سامح الصريطي وحنان مع إسعاد يونس
ـ أول ما قلت لابنتي ابتهال على فكرة ارتباطي بـ حنان فرحت فرحة شديدة.
ـ كنت معجب بحنان من أول لحظة شفتها فيها.
ـ من يوم ما شفت حنان وأنا شايفها ملفتة ومحترمة ومحافظة على شكلها وسلوكياتها هادئة وجذابة ودا اللي شدني ليها.
أما المطربة حنان فقالت عن سامح الصريطي:
ـ أعرفه من 4 سنين ونص، شوفته مرة في ندوة جنب بيتي واتكلمنا بعدها.
ـ بدأت صداقتنا وكنا بنتكلم مرة كل شهرين.
ـ طول الوقت كنت بحترمه كممثل وبني آدم ومبسوطة إني عرفته.
ـ كل فترة كنت بكلمه أحكي له على حاجة مضيقاني.
ـ كان دايمًا بيعزمني على ندوات وقعدات ثقافية في بيته.
ـ عجبتني دماغ سامح والتقينا في حاجات كتير مع بعض، ومع الوقت بقينا نتكلم أكتر.
ـ سامح جه في مرة قالي تعرفي إنك وحشتيني.. فقلت له متشوفش وحش.
ـ عزمته عندي ولما جه لقيته جايب حزمتين بقدونس.. قالي مش ده اللي انتي بتحبيه أنا جبتهولك.
ـ سامح قالي بعد ما أتغدينا مش فاضل غير إننا نتجوز، افتكرته بيهزر قالي أنا بتكلم جد.
