شاكوش عن تصريحات العسيلي حول تراجع المهرجانات: شغلنا يعيشنا 20 سنة قدام
أكد مؤدي المهرجانات حسن شاكوش، أن أغانيهم ستظل مستمرة، ردّا على تصريحات المطرب محمود العسيلي في أحد البرامج التلفزيونية، مفادها أن أغاني المهرجانات تراجعت.
وقال حسن شاكوش، خلال لايف عبر موقع إنستجرام: كل نجم ليه وقت، ولازم يأخد هدنة، بس لما بيرجع بيطلع حاجات هتقعدكم في بيتكم، وإحنا مجال المزيكا بتاعتنا والمهرجان والغنوة الشعبي ده مش هيموت، الناس تعبت من كتر الاكتئاب، والأغاني اللى بتجيب الاكتئاب وبتجيب ملل وبتعقد الناس.
وأضاف شاكوش: الناس ما بتصدق تسمع أغنية شعبي ليا أو لأى مطرب شعبي زي حموبيكا وعمر كمال، وبيحبوا يسمعوا أغاني بتاعتنا عشان بنطلع الواحد من المود، أنا مثلًا كحسن شاكوش لما بسمع أغنية لشيرين عبد الوهاب أو كده ببقى عايش مود الأغنية، فبكون حزين.
وأوضح حسن شاكوش: أغاني المهرجانات مكملة، وإحنا لسه هنبتدي في حياتنا ولسه صغيرين، ومفيش واحد فينا عدي الـ 40 أو 35 سنة، وإن شاء الله مكملين في النجاح، والنجاح اللى إحنا قدمناه يشغلنا ويعيشنا 20 سنة قدام، بس إحنا مش آخرنا كده، إحنا عايزين نطّور ونجدد.
وفي سياق متصل، أكد المطرب محمود العسيلي في تصريحات تلفزيونية أسباب تراجع أغاني المهرجانات على الساحة الغنائية خلال الآونة الأخيرة، قائلا: التريند بيتغير مع الوقت.. في واحد معرفوش وعمري بحياته ما سمعته، اسمه عصام صاصا، وهو الأكثر استماعا على جميع المنصات واليوتيوب في الوطن العربي، تقريبا بيغني مهرجانات.
