نساء على أبواب محكمة الأسرة بسوهاج| سميرة: إديته كل حاجة وطلع مايستاهلش.. وريهام: بيضربني وبيهين كرامتي
شهدت قاعات محكمة الأسرة في محافظة سوهاج، خلال الأيام الماضية، عددًا من دعاوى الطلاق لسيدات، بسبب الضرر الواقع عليهن من أزواجهن.
نساء على أبواب محكمة الأسرة بسوهاج
وعلى أبواب محكمة الأسرة في سوهاج، تعددت الوقائع واختلفت الأسباب، وتنوعت الحكايات واتفق الهدف في إنهاء العلاقة الزوجية بين الزوجين، علّه يكون الحل النهائي للمشاكل القائمة فيما بينهما.
سميرة: إديته كل حاجة وطلع مايستاهلش
تقول الزوجة التي تُدعى (سميرة. م) 42 عامًا، إنها تزوجت من أحد الأشخاص أصغر منها بـ3 سنوات، مشيرة إلى أنها وفرت له شقة سكنية تزوجا فيها، نظرًا لظروفه المادية الصعبة، على أمل أن تجد معه الحب والأمان والرعاية، إلا أنه خيب ظنها فيه واكتشفت أنه لا يستحق ما قدمته له، حسب قولها.
وأضافت الزوجة لـ القاهرة 24: اتجوزته برغم فارق السن اللي بينا بعد ما أوهمني بالحب وأنه اتعلق بيا، وأنه هايديني الحنية والأمان اللي اتحرمت منهم، كنت خايفة قطر الجواز يفوتني، وعشان أنا مرتاحة ماديًا جبت الشقة اللي عشنا فيها من 3 سنين، عشان عارفه أن ظروفه صعبة، وكنت بديله فلوس يصرف منها، لكن للأسف طلع ندل، واكتشفت أنه طمعان فيَّا وفي فلوسي، وكان عشمان ياخد كل اللي ورايا.
صفاء: حماتي بتعصيه عليا ومقويه قلبه
أمّا صفاء. ا. ح، التي تبلغ من العمر 37 عامًا، تقيم بدائرة مركز طما، أقامت دعوى طلاق للضرر ضد زوجها البالغ من العمر 43 عامًا، بسبب تعمد إهانتها والاعتداء عليها بإيعاذ من والدته حماة الشاكية.
وقالت الزوجة: إتجوزت من 11 سنة، وربنا كرمني منه بـ3 بنات، وكانت حياتنا هادية وماشية طبيعي، وبتحصل فيها خلافات عادية زي أي بيت، لكن منها لله حماتي خرابة البيوت، هي اللي قلبته عليا وغيرته من ناحيتي، وخربت بيتي، وكل ده بحجة إنها عايزاني أخلف ولد، وبتقولي لو ما جبتش الولد هاتخليه يفضل يضربني ويعاملني بطريقة مش كويسة.
ريهام: بيضربني وبيهين كرامتي كل يوم
في حين أقامت ريهام. ا. خ، 36 عامًا، دعوى طلاق ضد زوجها بمحافظة سوهاج، بعد تعرضها للضرب والإهانة على يد زوجها، وتعدد الخلافات فيما بينهما.
وقالت الزوجة في دعواها، إن زوجها دائم الشجار معها، وأنه خلال الفترة الماضية تعدى عليها بالضرب والشتائم، بسبب وبدون سبب، ما أدى إلى إصابتها بكدمات متفرقة في الوجه والجسم.
وأضافت الزوجة لـ القاهرة 24: بيستقوى عليا وبيتخانق معايا كل يوم لحد ما وصلت إنه يمد إيده ويضربني ويشتمني بألفاظ لا تقبلها أي ست، ومن غير سبب، وكل يوم لازم يصر إنه يصحيني الساعة 6 الصبح ويقولي قومي شوفيلك حاجة اعمليها واعملي بلقمتك.
