الملحن مدين عن عمرو دياب: ما بيهتمش بنفسه ومكرس حياته للشغل
تحدث الملحن مدين عن تعاونه مع الهضبة عمرو دياب، في أغنية بيوحشنا، من ألبومه الجديد مكانك، الذي طرحه مؤخرًا عبر منصة أنغامي.
وقال مدين في مداخلة هاتفية بأحد البرامج التلفزيونية، إنه سعيد بالتعاون مع الهضبة في أغنية بيوحشنا، مشيرًا إلى أن الأغنية كتبها تامر حسين، ووزعها أحمد إبراهيم.
وأضاف مدين: كنا فرحانين إحنا التلاتة بالنجاح لأنه تاني عمل لينا مع بعض مع الهضبة عمرو دياب، وأنا وتامر حسين وأحمد إبراهيم كل واحد عنده نجاحات كبيرة جدًا، ولما نجتمع إحنا التلاتة بيكون فيه حاجة حلوة، والروح حلوة بينا، بالإضافة إلى أن التعاون مع عمرو دياب له فرحة خاصة لإننا من معجبيه ومستمعيه.
مدين يكشف الفرق بين التعاون مع عمرو دياب وأي مطرب آخر
وعن الفرق بين التعاون مع عمرو دياب وأي مطرب آخر قال مدين: الأغنية الواحدة لـ عمرو كأنها ألبوم غير أنه بيحرك السوق ولما بينزل كله بينزل ولما بيعمل لون كله بيقلده والناس بتتشجع لما يعرفوا أن فيه ألبوم للهضبة، لأن عمرو دياب فيه طاقة غريبة وهو الليدر بتاع الصناعة عندنا في مصر ولما بيقدم أغاني مقاسيم كله بيقلده ولما بيقول دراما كل الناس بتقول دراما، لأن الناس واثقة فيه وفي ذوقه حتى الفنانين لأنه فاهم ذوق الجمهور.
مش بيهتم بأي حد غير الناس
وأكمل مدين: لاحظت من شغلي مع عمرو دياب أنه مش بيهتم بأي حد غير الناس ومش بيهتم بنفسه وحياته الشخصية في حاجات كتير وممكن يجي على نفسه ويسهر لحد 7 الصبح ومش بيهتم أنه يعيش الحياة الطبيعية ويستمتع بنجاحه لأنه بيحب يوصل للناس ذوقه وكلنا بنتعلم منه حتى الصناع والفنانين لأنه مكرس حياته للشغل فقط.
