بيتنا انطفى.. سمسم شهاب ينهار لحظة الحديث عن زوجته الراحلة: لما بتوحشني بروحلها المقابر
تحدث المطرب سمسم شهاب، عن زوجته الراحلة، التي توفيت قبل شهرين بعد صراع مع المرض إثر إصابتها بمرض السرطان، مشيرًا إلى أنه اشتاق لها ويزورها بشكل مستمر في المقابر.
وقال سمسم شهاب خلال لقائه مع القاهرة 24، موجهًا رسالة إلى زوجته الراحلة وهو يبكي: بقول لها وحشتيني جدا والدنيا من غيرك وحشة خالص، وكل حاجة ما بقاش ليها طعم، واللي بيخليني أعافر علشان ولادنا لأني عاوز أكون موجود في وسطيهم علشان بعد ربنا أكون سند ليهم، وباجي ليكي على طول أنا والولاد كل ما توحشينا واللي مطمني أنها في حتة كويسة.
وأضاف كاشفًا تفاصيل مرض زوجته قائلًا: فترة مرض زوجتي كانت صعبة جدًا، ولما بدأنا نعرف طبيعة المرض حالتنا كلنا في البيت اتغيرت 360 درجة والبيت اتطفى، لأنها كانت نوارة البيت وهي كل حاجة فطبعًا أثرت علينا وعلى الولاد وكلنا وقفنا معاها ورغم اللي أنا عملته حاسس أني مقصر، لأن هي تستاهل كتير أوي بس ما كانش بإيدي حاجة أعملها وأنا كان عندي أمل حتى لما دخلت العناية المركزة والدكاترة قالوا مفيش أمل، ولكن ده قضاء ربنا وإحنا راضيين.
وتابع سمسم شهاب: هي معايا في كل حاجة وماسبتنيش، هي جوه نفسي، واللي بيحلم بحد بيكون بعيد عنه لكن هي معايا.
