ده لامؤاخذة مسيحي.. عمرو سلامة يكشف سبب تسمية فيلم لامؤاخذة بهذا الاسم
كشف المخرج عمرو سلامة، القصة وراء تسمية فيلم لامؤاخذة بهذا الاسم، مشيرًا إلى أن هناك واقعة حقيقية وراء هذا الاسم.
وقال عمرو سلامة خلال حواره مع القاهرة 24: استوحيت اسم فيلم لامؤاخذة من واقعة حقيقية، كنت بتكلم مع حد وبيقولي الراجل ده كويس أوي بس هو لامؤاخذة مسيحي، فمفهمتش ليه لامؤاخذة، دي كلمة بتتقال قبل ما نقول حاجة غريبة أو عيب، فاستغربت ده وعملت اسم الفيلم كدة.
فيلم لامؤاخذة
عرض فيلم لامؤاخذة في عام 2014، وشارك في بطولته كل من الفنانة كندة علوش، هاني عادل، ميدو عادل، سامية أحمد، معاذ نبيل، رامي غيط، محمد عبد العظيم، وآخرين، والعمل من تأليف وإخراج عمرو سلامة.
عمرو سلامة: فيلم لامؤاخذة اترفض 7 مرات من الرقابة
وسبق وتحدث عمرو سلامة عن فيلم لامؤاخذة، كاشفًا أنه تعرض لرفض شديد من قِبل الرقابة، وقال خلال حواره مع القاهرة 24: فيلم لا مؤاخذة فضل مرفوض من الرقابة 5 سنين، وعدلته 7 مرات وكان بيترفض كل مرة، وحصل عليه مشاكل كتير جدا؛ لأنهم كانوا مقتنعين إن الفيلم ده لو نزل هيفجر فتنة طائفية في مصر، وحصل خناقات وتيارات سياسية كتير.
وأضاف عمرو سلامة: وفي الآخر صورت الفيلم ولما اتعرض مسببش أي مشاكل، بالعكس لقى استحسان كبير جدا عند الجمهور المسلمين والمسيحيين، فده كان أكبر إثبات إن الرقابة ساعات بتنفخ في الزبادي، لأنهم كانوا شايفين إن الفيلم هيبقى كارثة لما ينزل، وده محصلش وبالعكس الفيلم ده من أكتر أعمالي اللي بسمع عنها رد فعل إيجابي لحد دلوقتي.
