مدحت العدل عن النزاع على ملكية تسجيلات أم كلثوم: سكتنا كتير وبقى في تمادي.. إزاي الناس تستحلى حق غيرها؟
تحدث السيناريست الدكتور مدحت العدل، رئيس جمعية المؤلفين والملحنين، عن النزاع على ملكية أغاني كوكب الشرق أم كلثوم.
وقال مدحت العدل، في لقائه مع القاهرة 24: هي مش أزمة أم كلثوم بس، هي أزمة حقوق الملكية الفكرية، ولما جمعية المؤلفين والملحنين نزلت بيان عام ومقصدناش بيه حد، وقولنا فيه إن هذه الأغاني لـ أم كلثوم هي ملك لـ شركة صوت القاهرة وجمعية المؤلفين، لو حد عايز حاجة يجيلنا، وهناك قالت إحدى الشركات إنها تملك هذا الحق على غير وجه الحقيقة، زي ما قدمناه بالمستندات بـ إمضاء السيدة أم كلثوم وتنازل زوجها حسن الحفناوي.
وتابع مدحت العدل: إحنا قررنا نحط النقط فوق الحروف، ونبين بالورق والإثباتات، والقضية اللي بيقول أنه كسبها وخد فيها تعويض هي قضية مالهاش بالملكية الفكرية، وإحنا فضلنا ساكتين لغاية ما الموضوع تمادى، فقررنا نحط النقط فوق الحروف لأننا مؤتمنين على الأعضاء اللي إحنا بنمثلهم وورثة هؤلاء الأعضاء.
كما علق الدكتور مدحت العدل، على تصريحات الفنان والملحن عمرو مصطفى، بشأن حقوق الملكية الفكرية، قائلًا: وجهة نظر عمرو إني مش هعمل تنازل أنا شريكك بس أخد حقي الأول، يعني حق الملكية الفكرية أن لما تاخد أغنية وتعملها بـ توزيع تاني يكون له حق فيها مادي، مش بنقول كلام من عندنا، والرئيس مضى على بروتوكول حق الملكية الفكرية اللي أصبح شيء مهم جدًا، وإحنا بـ ننفذ القانون ده على أعضائنا حماية ليهم وإبداعهم.
واستكمل: في ورثة ناس كانوا ملئ السمع والعين والبصر، حقيقي محتاجين علاج ومحتاجين يعيشوا، أنا إزاي يجيلي قلب أكل حقوق الناس دي؟ إحنا جايين ندافع عن حقوقهم.
محامي جمعية المؤلفين والملحنين: أم كلثوم وقعت عقدا لـ صوت القاهرة
وسبق وأن عرض حسام لطفي، محامي جمعية المؤلفين والملحنين، مستندات أكدت أن الراحلة أم كلثوم سبق وأقرت ووقعت على أن شركة صوت القاهرة هي المالك الوحيد لجميع تسجيلاتها، حيث قال بالمؤتمر الخاص بالجمعية: أم كلثوم كل تسجيلاتها ملك شركة صوت القاهرة، عندنا العقود وأم كلثوم كانت بتاخد نسبة من الأسطوانة وكانت بتاخد التلت، ودلوقتي ورثة أم كلثوم بتاخد هذا الحق.
وأضاف: شركة الخِصم لجأت لورثة أم كلثوم وقالت إننا هناخد النسبة دي منكم، وبدأوا يدّعوا أن هما صحاب التسجيلات الصوتية، ورفع قضية وراحت للمحكمة والخِصم قال لشركة صوت القاهرة أنها ملهاش حق في الأغاني.
