بعد ظهوره بقميص العطار والسبع بنات..عماد رشاد: بخزن لبسي من 40 سنة وإلا كنت هنام على الرصيف
كشف الفنان عماد رشاد سر ارتدائه القميص الذي ظهر به منذ 23 عامًا، حيث ارتداه للمرة الأولى في مسلسل العطار والسبع بنات، ومن ثم ظهر به في مسلسل عيش أيامك، ومؤخرًا وبعد 20 سنة ظهر به في مسلسل زينهم.
وقال عماد رشاد في لقائه مع القاهرة 24: حاجة تشرفني وتسعدني أنها تتلاحظ، والممثل ليه أدوات زي شكله ولياقته البدنية، وطبقات صوته، وإحساسه، ولبسه، زي الدكتور معاه المشرط وأدوات أخرى، لو خدتها منه مش هيعرف يشتغل، وأنا من ضمن أدواتي الملابس، وشغلتي كممثل أن يكون عندي ملابس أكتر من المهندس أو الدكتور أو الظابط، المفروض يكون عندي لبس أكتر منهم مش علشان أتمظهر بيه ولكن علشان مهنتي بتحتاج اللبس ده.
وأضاف عماد رشاد: أنا بصرف أكتر من 50% من أجري على اللبس، وعندي مخزن للملابس وبخزن فيه لبسي من 40 سنة وتشوفيها تقولي لسه شاريها امبارح، لأنها اتلبست مرة أو اتنين، ولو حذاء بضعه في الكيس بتاعه يتلمع ويتشال، ولو قميص بيتشال في كيس شفاف علشان يحميه، ولو بدلة بتتحط في الكافر وتتشال، والموديلات دي رجعت دلوقتي، ويبان أني لسه شاريهم امبارح لأني مالبستهمش في حياتي العادية، وبوظفهم في أكتر من مرحلة لأني مش هقدر أشتري لبس لكل عمل، وبره لما بيعلموا أي فيلم أو مسلسل اللبس كله على الإنتاج عكس هنا في مصر.
وأضاف عماد رشاد: أنا عامل فوق 100 مسلسل لو اشتريت لـ 100 مسلسل كان زماني نايم على الرصيف مش معايا أكل، ومش هقدر أشتري حاليًا لأن الأسعار غليت والبدلة العادية بتمن 10 آلاف، لكن البدل بتاعتي القديمة تساوي حاليا 100 ألف جنيه، وأنا جايبها بأرقام عادية جدًا وده رصيد وفرته ليا أكتر، خاصة أن معظم أدواري لراجل بيعرف يلبس وفي مستوى عالي.
وأكمل عماد رشاد: عندي حاجات قديمة ومتبهدلة ومتقطعة ودايبة مش برميها بشيلها، لأني ممكن أحتاجها في دور، بدل ما ألبس من مخزن ملابس الاستوديو وخمسين واحد لابسها قبل كده ومركونة، وده مش غلط، واللي قاعد وركز في القميص اللي من 23 سنة، بشكره لحسن الملاحظة واهتمامه، وده من أدواتي لكن ما أقدرش أجيب لكل مشهد لبس، لأن المسلسل 30 حلقة يعني بحتاج ما لا يقل عن 90 طقم، لأنه مش ممكن هشتري 90 طقم لكل مسلسل.
عماد رشاد: كنت حريصا على شراء ملابسي من خارج مصر
واستطرد: كنت بشتري لبسي لما أسافر، لأنه ما ينفعش خاصة لو عامل شخصية كلاس، أني ألبس لبس مكرر أو حد تاني لابسه، لأني لو جبت لبس من مصر ممكن ألاقي خمسة ستة في الشارع لابسين يبقى كده أخطأت، ولذلك كنت بجيب قطع واثق أني مش هلاقي شبيهها في مصر، مش علشاني أنا ولكن علشان التمثيل ودي مش منظرة أنا لابس مصري علشان الشغل ياخد حقه مني وأكون مقتنع في المسلسل، واللبس اللي كنت بجيبه ما أعرفش أجيبه دلوقتي، وفيه كرافتات حرير لقيت زيها ونفس الألوان بـ 12 ألف جنيه في المهندسين، مازحًا: ولو حد اشتري كرافتة بالمبلغ ده هضربه علقة، وأنا عندي منهم كتير وبلبسهم والجدع بقى ياخد باله.
