حمزة الصغير عن بكائه بحفل زفافه: مكنتش مصدق إني اتجوزت.. ومروى حسستني قد إيه أنا بني آدم
حل المطرب حمزة الصغير وزوجته التونسية مروى هنيد، ضيوفا على الإعلامية نورين شحاتة، في برنامجها البيه والهانم، الذي تقدمه مع الإعلامي ممدوح الشناوي عبر شاشة القاهرة والناس.
وكشف حمزة الصغير، سبب بكائه في حفل زفافه قبل 6 أشهر، موضحًا: كنت فرحان بيها أوي وما كنتش مصدق أني هتجوز وأكون عريس، وما كنتش متخيل أن كل الناس دي بتحبني، ولما عملت ليها أغنية مفاجأة لقيتها مبسوطة فبكيت ومقدرتش أمسك نفسي، ومكنتش معرفها وكانت بتكلمني أقول لها أنا في الشغل وأنا بحضر الأغنية.
وعبر حمزة الصغير عن شدة حبه وامتنانه لزوجته، قائلًا: من أكتر الناس اللي بتشجعني في حياتي، ولما مراتك تكون مراتك وصاحبتك في نفس الوقت فبتكون العلاقة بينكم محترمة، وهي حسستني قد إيه أنا بني آدم وإنسان، ورجعت لي الجانب الإنساني اللي يخليني حاسس دايما بالناس.
وعن كيفية فهمه لحديث زوجته خاصة أن اللهجة التونسية غير مفهومة لبعض المصرين بشكل كبير قال: التونسيين لما بيندمجوا أوي في الكلام مش بيتفهم حاجة منهم، مازحًا: بكبر دماغي، طالما ما اتقالش حمزة ما اتكلمتش لأن فهم الكلام بياخد طاقة ومجهود.
أحدث أعمال حمزة الصغير
على جانب آخر، كشف المطرب حمزة الصغير أنه يستعد لطرح أغنية جديدة، بعد تعرضه للخذلان من أصدقائه، مشيرًا إلى أن كلمات الأغنية تنطبق مع الموقف الذي حدث معه.
وغنى حمزة الصغير جزءا من الأغنية لأول مرة خلال لقائه في البيه والهانم، وتقول كلمات الأغنية: يوم صحيت رنيت، بعت لكل صحابي رسالة، كتبت فيها أني في شدة وأن أنا محتاجكوا يا رجالة، أول واحد فتح الشات هوبا لقيته قال لي في حكايات وفضل يشكي في حاله ويندب ويقول في الآخر إحنا أخوات، تاني واحد يا با رد عليا قال لي وماله يا أخويا عنيا بس الدنيا مزنقة حبة اصبر بس يا صاحبي شوية، أما يا ناس بقى صاحبي العرة فتح الشات لكن من بره وعمل فيها من الهند ونفض وقلت وماله هتجي لي بكره، يخربيت أم المادة بينت كله في الشدة، صفيت كله اتفضل لي نفسي وبس من النهارده.. لما لما كنت صحبة ولما كنتم صحابي إزاي بالذمة.
