عماد رشاد عن علاقته بزوجته المعتزلة راوية صالح: كنت شاب حلو ويتغار عليا لكن عمري ما خنتها
كشف الفنان عماد رشاد، أسرارًا عن علاقته بزوجته الفنانة المعتزلة راوية صالح، مشيرًا إلى أنه لم يخنها طيلة فترة زواجهما على مدار 40 عامًا، إلى جانب حديثه عن سبب اعتزال زوجته منذ سنوات طويلة.
وأكد عماد رشاد خلال لقائه مع القاهرة 24، أنه على الرغم من أنه كان يتعامل مع الجميلات والمشاهير إلا أنه لم يفكر مطلقًا في خيانة زوجته، إذ قال: لو خنتها يبقى أنا بقلل من احترامها ومين يوافق يقلل احترام مراته صعب، احترام مراتي من احترامي لنفسي، ولما أهينها بأني أعمل علاقات أخرى، يبقى كده بهين المرأة اللي شايلة اسمي وكنت بخاف على ده جدًا، وكنت حريص أخليها دايما الناس لما يبصوا ليها يبصوا ليها لفوق من وقت لما اتجوزنا لحد دلوقتي اللي حوالينا لما يبصوا ليها كأنها حد عالي فوق اللمس.
وتابع عماد رشاد: في الأول كانت غيرة ممكن تدمر حياتنا لكني كنت بحاول استوعب ده وأصفيه وكنت عارف إنه لازم يحصل، وأنا كان يتغار عليا وهي عندها حق هي كانت بطلت تمثيل وأنا بشتغل مع جميلات الوسط كله، وبتعامل مع جميلات مصر كلها وسيدات محترمات وشياكة وجمال وكنت عارف إنه لازم يحصل وقدرت ده واستوعبه، والغيرة كانت شديدة أوي، لكن مع الزمن لما لقت أن مفيش حاجة يتهز بيتها مرة واتنين بقيت تستقبل ده.
وعن اعتزال زوجته قال: لم أتدخل في اعتزالها ولكنها اتخذت القرار بمفردها، خاصة لما أنجبت ابنتنا ياسمين وياسمين تتحب أوي ولما أنجبنا نديم شعرت إنه فيه مسؤولية كبيرة واختارت إنها تقعد، وأنا أموري ميسرة ما كانش فيه تضحية في حياتنا.
