عماد رشاد: هذا الشيء زرعته في أبنائي.. ومبقتش كريم أوي في مشاعري مع أحفادي
تحدث الفنان عماد رشاد عن بنيه نديم وياسمين وسبب عدم دخولهما الوسط الفني، إلى جانب حديثه عن أحفاده ومدى تأثرهم به وقراره بالابتعاد عنهم قليلًا.
وقال عماد رشاد خلال لقائه مع القاهرة 24: نديم ما فكرش يدخل الوسط الفني أو يمثل نهائي، وياسمين كانت مطلوبة، واتفقت على فيلم صعيدي في الجامعة الأمريكية وسابتهم قبل التصوير بيومين وقالت أنا عارفة الوسط الفني لأن زوج خالتها أحمد عبد العزيز ولدينا أقارب كتير في الوسط الفني، وهي رفضت الشغل.
وعن أكثر شيء اهتم بزراعته في أبنائه قال: الصدق مع النفس والآخرين، وعلمتهم يقولوا كلمة الحق حتى لو هيخسروا، اخسر ولكن لا تنافق لأني أكره ما عندي أشوف حد بينافق حد قدامي، إن شاء الله تخسر حياتك ولا تنافق، ودوري أني أناقشهم لكنهم أصحاب القرار هما اللي هيمروا بالتجربة وهيدفعوا الفاتورة مش أنا.
عماد رشاد يتحدث عن علاقته بأحفاده
كما تحدث عماد رشاد عن علاقته بأحفاده قائلًا: بعد ما ياسمين خلفت أدهم ارتبطت به بشكل كبير وخدته عندي وكنت بنزله لباص المدرسة، وناس كتير قالوا لي ده هيكون خطر عليهم مش عليك، ولقيت الموضوع مهم ولذلك بدأت أبعد سنة وأسيبهم يخبطوا في الدنيا، لأني جربت ألم الرحيل بداية من رحيل خالي أحمد ضياء الدين ومن ثم أبويا وأمي وبعض الأقارب وبعدهم فاروق الفيشاوي، وبيصعب عليا لو حد بيحبني يحصل له اللي حصل لي، وبدأت ما أكونش كريم أوي في المشاعر علشان ما يفتكرونيش كتير لما أموت ويضايقوا.
كما تطرق عماد رشاد إلى الحديث عن نشأته قائلًا: أنا اتربيت في بيت عائلي، وأنا وأخواتي عددنا سبعة، وكان لازم نتجمع كلنا وقت الأكل على السفرة ولحد ما اتجوزت وخلفت هناك الساعة تلاتة من غير ما حد ينده لحد الكل يطلع ونقعد على السفرة، وأنا اتربيت على جو الأسرة وهي نمرة واحد في الحياة دلوقتي علشان آكل مع أحفادي وولادي لازم أقول لهم هعزمكم لأن الحياة مش بتستحمل وده شيء مؤسف.
