عنبة يحكي مواقف مؤثرة له مع أهالي منطقة السلام: لسة عايش هناك وشاهدين على شقايا
تحدث الفنان عنبة عن أهل منطقته السلام، والمهن التي عمل بها قبل الشهرة، مشيرًا إلى أنه لا يترك منطقته حتى الآن ويعتز بأهالي منطقته وحبهم له.
وقال عنبة خلال لقائه في القاهرة 24: شقتي في السلام زي ما هي، ولما بروح هناك وحد يشوفني بيروح يقول لصحابه وبيجمعوا بعض بالتليفون وبفرح كأني رايح فرحي.
وأضاف عنبة: قبل العرض الخاص لفيلم عصابة عظيمة، كنت تعبان وما روحتش مستشفى، وروحت صيدلية بثق فيها في السلام منطقتي، وعلقوا ليا 3 محاليل وكنت لابس الكاب وتوقعت محدش ياخد باله، ولكن فوجئت بولاد بلدي جايبين ليا بيبسي وعصير.
وأكد عنبة أنه يعتز بأهالي منطقته وهم يحبونه كثيرًا قائلًا: عمري ما شفت منهم غيرة لأنهم معايا من وأنا طفل وكلهم بيقولوا لي عارفين إنك تعبت، وبفرح لما حد فيهم يقول ده عنبة صاحبي ويتفاخر بيا.
وأكمل عنبة: الشقى أهم حاجة فيه أنه بيخليك راجل مش بس في البطاقة، وبتعرف نعمة ربنا عليك أكتر، ولما بتحس أن فيه لحظة زعلان فيها بتقول الحمد لله أنا بقيت فين وكنت فين، وأنا كان طول عمري حلمي أكون مغني والناس تحب تسمعني وأكون مشهور ومش بحاجة تافهة بالعكس بشيء مؤثر في الناس، ولما حلمت أكون ممثل في أول عمل ليا كنت خايف جدًا لأني لو ما نجحتش هيأثر على شغلي في الأغاني اللي ما اتوفقتش فيها، والحمد لله بقيت مقبول وحلمي بيكبر وعمري ما حسيت إني وصلت للنجاح اللي عاوزه لكن طول الوقت عندي طمع في النجاح وطمع في نفسي وفي نفس الوقت مش على حساب حد.
