عنبة: رفضت أعمل أغنية لـ فلسطين وأتبرع بأجرها لأن ده مش هيحررها.. وأنا مش بتاع شو
تحدث الممثل ومطرب المهرجانات عنبة، عن دعمه للقضية الفلسطينية، مشيرًا إلى أنه عُرض عليه تقديم أغنية عن فسلطين ولكنه رفض لأنه يرى أن الأغنية لن تحررها.
وقال عنبة خلال ندوة تكريمه في القاهرة 24: وقفت حفلاتي واللايفات اللي كنت بطلعها وأنا مش بتاع شو، ولكن شفت لو هخسر فلوس بس هكسب نفسي، وهكون حقيقي بيني وبين نفسي ومش هحس إني منافق، وكذا حد طلب مني أعمل أغنية لفلسطين وأتبرع بأرباحها لكن الفلوس دي مش بتوصل للناس، والأغنية مش هتحرر فلسطين.
وأضاف عنبة: فلسطين محتاجة وقفة والموضوع كبر عن زمان، ومبسوط أن فيه شباب كتير وجيل طالع قاعد على تيك توك وفاهم اللي بيحصل، والسوشيال ميديا كلها حالة لكن في وقت الجد فيه جد، والشباب الصغير أثبت أنه عارف فلسطين ومهتم بالقضية.
وتابع عنبة: دعمي لفلسطين شيء إنساني وأنا بعمل اللي اتربيت عليه واللي شايفه صح، ولحد دلوقتي أضع صورة غزة صورة البروفايل الخاصة بي ومش هشيلها إلا لما احس أن الدنيا بقيت تمام.
وأشار عنبة إلى أن فيلم عصابة عظيمة الذي يعرض حاليًا بدور العرض السينمائي، ويشارك فيه مع الفنانة إسعاد يونس، تناول القضية الفلسطينية واهتم بها.
في سياق متصل، تحدث عنبة عن دخوله عالم التمثيل بداية من مشاركته الفنانة يسرا في مسلسل 1000 حمد لله على السلامة والذي عرض في الموسم الرمضاني الماضي، ومن ثم مشاركته الفنانة إسعاد يونس في فيلم عصابة عظيمة، إذ قال: أنا من زمان وأنا بتفرج على أي عمل كنت بشوف نفسي في بعض الأدوار وبقول أني لو مثلت الدور ده هقدمه كويس ومش هكون خايف أو مكسوف.
وأضاف عنبة: اتعرض عليا في البداية أعمال كتير، ولكن كنت دايما بقول يا رب ابدأ بداية حلوة، وفعلًا ربنا استجاب ليا وأول بداية دراما مع يسرا، وأول بداية سينما مع صاحبة السعادة إسعاد يونس، ويسرا كانت فرحانة إني بمثل مع إسعاد يونس.
