مروان يونس عن دخول مشاهير بالسوشيال ميديا مجال التمثيل: إيه المشكلة لو عندهم موهبة؟
كشف الفنان مروان يونس، رأيه في ظاهرة دخول مشاهير السوشيال ميديا عالم التمثيل، مشيرًا إلى أنه لا يرى أي مشكلة في هذا، حال كان لديهم الموهبة الحقيقية.
وقال مروان يونس خلال لقائه مع القاهرة 24: مش غلط لو الشخص اللي طالع على السوشيال اتشهر وموهوب، لكن مهم إنه يكون موهوب في التمثيل، لأنه ممكن يكون موهوب في السوشيال ميديا ولما يمثل ما يكونش لطيف، ولو ده حصل هو هيعرف ده مع الوقت وكذلك المخرج والمنتج هيتكشفوا مع الوقت عدم موهبته.
وأضاف مروان يونس: دايمًا بلاقي الناس ضد دخول مشاهير السوشيال ميديا التمثيل، لكن إيه المشكلة؟، هو اتشهر لأن ربنا أعطى له قبول وواضح إنه بيعمل حاجة كويسة، لكن في ناس تانية بتتشهر بشكل مؤقت، وممكن يكون حد عمل تريند والناس اتريقت عليه ويتجاب كإفيه وده برضه مش غلط طالما بيزود المشاهدة.
في سياق آخر، تحدث مروان يونس عن حضوره العرض الخاص لفيلم الملكة بطولة الفنانة هالة صدقي، والذي أقيم أمس بحضور أبطاله في إحدى سينمات التجمع الخامس.
وقال مروان يونس خلال لقائه مع القاهرة 24: بصراحة بقى لي كتير ما نزلتش من البيت لكن الفيلم ده نازله لسبب إني جاي اتسلى وبقى لي كتير ما نزلتش أروح السينما علشان أكل فشار واتفرج على فيلم، وحاسس أنه هيكون فيلم لذيذ وجاي اتبسط بمنتهى البساطة، وأبارك لزملائي شيرين رضا ومحمد رضوان، وهالة صدقي بموت فيها واسم الملكة شدني علشان دور صفصف في جعفر العمدة لكن حاسس أن الفيلم هيكون مختلف.
وظهر مروان يونس مرتديًا تيشرت عليه شعار مولود في مصر وقلبي في فلسطين، قائلًا: التيشرت من تصميمي، وعملته وقت الأحداث المؤلمة التي تشهدها غزة واللي ما زلنا فيها كنوع من أنوع المساندة ولما كنت بعرضها في معارض كانت أرباحها بتروح لمساندة أخواتنا في فلسطين وربنا يكون في عونهم.
