خالد عليش عن أزمته مع طليقته: ليه يكون عندنا 50 ألف نفقة وأجر للرضاعة؟
طالب المذيع والفنان خالد عليش بتعديل بعض القوانين التي لها علاقة بالنفقة ورؤية الطفل، مشيرًا إلى أن هناك تطور عن السابق والجيل الحالي لا يناسبه ما كان يحدث في السابق خاصة أن حالات الطلاق زادت بشكل كبير في السنوات الأخيرة، مستنكرًا زيادة عدد النفقات التي يدفعها الأب ومنها أجر الرضاعة.
المأذون بيكسب من الطلاق أكتر من الجواز
وقال خالد عليش خلال ندوة تكريمه بالقاهرة 24: القانون نفسه فيه مشكلة، وكل القيادات العليا أقرت بده، والمشكلة هتتحل بعد سنة أو خمسة لأننا بنتطور والأجيال بتطور والدنيا بتطور وممكن ده يكون مناسب من عشرين سنة لكن النهارده مش مناسب، ونسب الطلاق زادت بشكل كبير، وزمان كنا بنستغرب لو سمعنا عن حالة طلاق ولو حد معايا في المدرسة والده ووالدته منفصلين كنا بنستغرب، لكن النهارده حالات الانفصال أكتر من الطلاق والمأذون بيكسب من الطلاق أكتر من الجواز، فلازم يكون فيه قانون يحكم العلاقة، لأن الدنيا بايظة.
وأوضح خالد عليش أن قانون الرؤية يحتاج تعديلات، تسمح للأب برؤية طفله عدد ساعات أكبر والخروج معه عكس ما يحدث، قائلًا: في حاجات كتير محتاجة تعديل زي قانون الرؤية اللي مفيهوش حاجة اسمها استضافة، فلو أنا أب حصل انفصال بيني وبين والدة طفلي وأنا مجرد بطلب أشوف الطفل مش أشارك في تربيته وده حقي، لأني المفروض اخد الطفل استمتع به ونخرج، لكن القانون بيعطي عدد معين من الساعات فقط في مكان عام استنادًا على أن الأب ما يخدش الطفل ويهرب، وزي ما الراجل مظلوم في الجزء ده الست كمان مظلومة، وأنا مش بقيس على نفسي لأني أكيد مش هخطف البنت، لكن فيه ناس بيحصل معاهم كده، ودي أم وخايفة.
وتابع: لكن ممكن الموضوع يتعدل ببساطة، ولو حصل أن الطفل حصله حاجة أو الأب خطفه، يتحبس فورًا فالراجل هيضطر يرجع الطفل، والست مش هتمسك الراجل من زمارة رقبته ومش هيحصل تفاوض منها فيما بعد وتقول لطليقها زود الفلوس علشان هديك الطفل عدد ساعات أكبر.
ليه يكون عندنا خمسين ألف نفقة
وأكمل خالد عليش: الست بتقول لطليقها زود الفلوس بسبب القوانين الموجودة، وليه ما يكونش فيه تجميعة للنفقات، ليه يكون عندنا خمسين ألف نفقة، ونفقة فرش وغطا وأجر رضاعة، ليه أدي أجر علشان أم ترضع بنتها وأجر حضانة، ليه ما يكونش مصاريف الطفل فقط، ليه لازم يكون فيه خازوق في كل حاجة.
