جيلان علاء عن حصرها في أدوار الكوميدي: مش بحب النكد
تحدثت الفنانة جيلان علاء، عن حصرها في الأدوار الكوميدي فقط، موضحة أنها تفضّل البقاء في منطقة الكوميديا؛ نظرًا لتميزها فيها بشهادة الجمهور.
وقالت جيلان علاء، خلال تصريحاتها لـ القاهرة 24: بحب التراجيدي والكوميدي، بس نجحت في الكوميدي أكتر، والناس لسة مزهقتش مني ومخدتش تعليقات وحشة عنه، فـ أحب أفضل في الكوميدي، أنا متميزة فيه بشهادة الناس، ليه مدام بعرف أعمل حاجة بشكل كويس أروح للحاجة البعيدة؟
وتابعت جيلان علاء: معنديش مشكلة أفضل أعمل كوميدي، وأنا بالفعل جربت التراجيدي في بعض الأعمال بس حبيت الكوميدي أكتر، اللوكيشن بيكون فاكك ولذيذ والناس بتضحك، أحسن من الأكشن والضرب، أنا مبحبش النكد إحنا عايزين نضحك، ولما بنبقى سبب في ضحكة البني آدم بناخد صدقة.
كما سبق وعلقت جيلان علاء على تقليدها للفنانين، والانتقادات التي تتعرض لها بسبب تلك الفيديوهات، وقالت خلال لقائها مع القاهرة 24: الناس بترد للناس، جمهور هنا الزاهد ممكن يفتكر أني بهين هنا وأني إزاي بعمل كده وهنا نفسها بتضحك.. الناس بتسن سنانها على أي حد.. وصحاب الموضوع مبسوطين، الناس أوفر وبتعمل مشاكل وفيه ناس هحبسها قريبا.. وأنا بحب الضحك والناس بتحب الضحك، متقفوليش الموضوع وتكرهوني في حياتي.
أعمال جيلان علاء
شاركت جيلان علاء في العديد من الأعمال الفنية الكوميدية، آخرهم مسلسل نصي التاني بطولة الفنان علي ربيع، حيث عرض المسلسل على منصة شاهد الإلكترونية، وشارك بالعمل كل من الفنانة سلوى عثمان، محمد محمود، محمود البزاوي، وفاء عامر، رنا رئيس، وغيرهم.
