حمو بيكا: نفسي أرجع لحياتي القديمة.. وويجز مبقاش موجود
حل مؤدي المهرجانات الشعبية حمو بيكا، ضيفًا على الإعلامي هيثم بسّام في برنامج ورقة في ملف على شاشة قناة النهار، متحدثًا عن بداية مشواره الفني، ورأيه في المهرجانات الشعبية والراب خلال الفترة الحالية.
وقال حمو بيكا: مفيش حاجة مشتغلتهاش، وكانت فترة جميلة، وكنت في أسعد حياتي، وبنام مطمن ومرتاح، وأتمنى أرجع لحياتي القديمة طبعًا، أنا شيلت مسؤولية كبيرة، وكان في الأول فيه والدي ربنا يخليه ليا موفرلنا كل حاجة.
وأضاف: كل بتوع الراب إخواتنا، وهما مقطعوش عيشنا، هو الراب مش موجود حاليًا، والمهرجان هو اللي موجود، دلوقتي عصام صاصا أي أغنية بينزلها لازم تتصدر التريند، فين ويجز دلوقتي؟ هو منزلش حاجة، هو ويجز حلو وابن بلدي وبيمثلنا برا وحاجة كبير، بس مش بينزل دلوقتي.
وأردف حمو بيكا: أنا لما بدأت الغنا مكنش فيه غيري في الساحة، وعملت اللي نفسي فيه كله، ولما يطلع عصام صاصا أفرحله وليه أحقد عليه؟ نشجع بعضنا كمان، فيه ناس مبتحبش كده.
ورد حموب بيكا، على منتقدي المهرجانات الشعبية واتهام البعض بأنها فسدت الذوق العام، قائلًا: هنخرب البلد ليه؟ إيه عملناه خربنا البلد؟ إحنا معملناش حاجة، أنا دخلت في فنادق عالية وغنيت لأمراء، وأنا معايا فرقة مكونة من 20 نفر، أعضاء عاملين كلهم، ويمكن ربنا بيديني عشان الناس دي.
برنامج ورقة في ملف
الجدير بالذكر أن الإعلامي هيثم بسّام يقدم برنامج ورقة في ملف عبر شاشة قناة النهار، ويذاع البرنامج يوم الخميس من كل أسبوع في تمام الساعة الرابعة عصرًا.
