هاني خليفة: رحلة 404 لمس حاجة جديدة جوايا.. وهذه كواليس التحضير للفيلم مع منى زكي
كشف المخرج هاني خليفة كواليس فيلم رحلة 404 بطولة الفنانة منى زكي، والذي بدأ عرضه في السينمات أمس الأربعاء، وهو العمل الذي كتب السيناريو الخاص به منذ عام 2013 للمؤلف محمد رجاء، ولكن لم يكتب له أن يخرج للنور طيلة السنوات الماضية.
وقال هاني خليفة على هامش حضوره العرض الخاص للفيلم: ما صادفنيش قصة شبهه في أي فيلم شفته وأول مر ة اقرأ عمل بالشكل ده، والفيلم قصة مختلفة ولما قرأت السيناريو لمحمد رجاء من زمان استغربت جدًا، لأن القصة عجيبة جدًا.
وأضاف هاني خليفة: في الفترة دي كنت عملت فيلم واحد، وكنت بدور على شيء مختلف وقصة مختلفة ومش قصة شبه الأفلام، لأني مش بحب الأفلام اللي بتكون شبه بعضها بطريقة معينة، لكني بحب الفيلم يكون قصة مختلفة زي أفلام كتير مختلفة عندنا في تاريخ السينما من النوع ده لـ صلاح أبو سيف هنري بركات، وأنا حسيت أن الفيلم مش قصة تقليدية.
أكثر ما جذبه للفيلم
وعن أكثر ما جذبه لتقديم الفيلم خاصة أن معظم أعماله تحمل بعدًا إنسانيًا ونفسيًا قال: لمس حاجة جديدة جوايا، وبيناقش حاجة تانية ليها علاقة بصعوبة الدنيا والامتحانات اللي ممكن القدر يحطك فيها، وده جزء من امتحان الدنيا، علشان كده بقول أني عمري ما قرأت حاجة شبه كده يعني.
تحضيرات الفيلم
وتابع هاني خليفة عن التحضيرات للفيلم وبالأخص شخصية غادة التي تحمل أبعاد نفسية وتجسدها منى زكي قائلًا: بنحضر ونذاكر ونقلق ونخاف، وشخصية غادة بعيدة عن منى زكي، وده كان شيء مغري إننا نجرب شيء مختلف وحاجة عمرها مع قدمتها، ونشوف هيطلع منها إيه، وكنا بنكتشف إيه ممكن يتعمل.
وعن التحضير للفيلم ومدته قال: التحضير للفيلم خد مراحل كتير أوي، والفترات متداخلة في بعض، وكان فيه جلسات كثيرة مع محمد رجاء، والدنيا بتتغير على مدار السنوات اللي فاتت، والفيلم بيكبر وإحنا بنكبر معاه، ولحد من شهرين كان فيه تغيرات، وهو كان جزء من حياتنا لفترة كبيرة جدًا.
عدم اللجوء لمشاهد الفلاش باك
وعن عدم وجود مشاهد فلاش باك في الفيلم والاعتماد على مشاهد السرد للتعريف بشخصية غادة، قال: ده كان اختيار المؤلف محمد رجاء وده أذكى حاجة هو عملها، واللجوء للفلاش باك مش بيعتبر في التكنيك أحلى حاجة، لأنه بيدل على أنك مش قادر تحكي فبتقتطع زمن من الماضي تحكي به حاجة، لكن الشطارة أكتر إنك تحكي في الزمن الآني كل حاجة موحية باللي فات، وإنك تتعرف على تاريخ الشخصية فاللي عمله محمد رجاء هو الأصعب.
وحرص هاني خليفة على توجيه الشكر لجميع المشاركين في العمل بجانب منى زكي، قائلًا: لازم أشكرهم كلهم، لأن مساحة أدوارهم مش أكبر حاجة، وعملوا ده بمحبة بالغة لمنى زكي، ومحمد حفظي ثانيًا، وليا ثالثًا، ومخدناش صعوبة نقنع حد، لأن كان فيه تعاون ودعم وكلهم صحابي علشان كده بجردهم من الألقاب.
