المنتجة شاهيناز العقاد: راضية عن فيلم رحلة 404.. وأنجذب لـ القضايا الإنسانية
تحدثت المنتجة شاهيناز العقاد، عن تجربة فيلم رحلة 404 بطولة الفنانة منى زكي، مؤكدة أنها راضية عن العمل ككل وتأمل أن ينال إعجاب الجمهور.
وقالت شاهيناز العقاد على هامش حضورها العرض الخاص للفيلم: اللي حمسني لـ فيلم رحلة 404 القصة، زي كل مرة محمد حفظي بعتلي الفيلم رديت قولتله أنا موافقة، والفيلم إنساني أوي، ساعات بنتسأل الإنسان الشرير ده جاني ولا مجني عليه، وده اللي حمسني للفيلم.
وأكدت شاهيناز، أنها تنجذب للقضايا الإنسانية وليست التي تخص المرأة فقط، موضحة: أنا مش بتحمس لقضايا المرأة، ويمكن علشان المجتمع شايف أن المرأة مظلومة فشايف إني بتحمس لقضايا المرأة، ولكن لأ أنا بتحمس لأي قضية إنسانية، بس يمكن علشان المرأة جايين عليها فكل القضايا تخصها.
وتابعت: اللي لمسني في الفيلم التجربة البشرية ككل لأن البني آدم مفيش حد كله وحش وكله كويس، ومفيش حد مبيتغيرش، ومفيش حد مبيغلطش، والفيلم طالع أحلى من ما كنت أتصور في رأيي، وبحبه كله على بعض مفيش مشهد محدد محبب لي.
رسالة فيلم رحلة 404
أما عن الرسالة الرئيسية لـ فيلم رحلة 404، فأوضحت شاهيناز العقاد: رسالة الفيلم أن يا جماعة مفيش حاجة اسمها يا إسود يا أبيض، لأ في درجات كتير في النص ومش عيب إننا نغلط، وبلاش الحكم على الناس لأننا مش عارفين ظروفهم، وأنا حاسة أن الفيلم اتعمل على أكمل وجه والفيلم حقق قدر من الإمتاع وراضية عن الفيلم.
فيلم رحلة 404
شارك في بطولة فيلم رحلة 404 مجموعة من الفنانين منهم منى زكي، محمد ممدوح، محمد فراج، شيرين رضا، خالد الصاوي، حسن العدل، والعمل من تأليف محمد رجاء وإخراج هاني خليفة.
