مكنتش أعرف أنها ممنوعة.. أقوال المتهم بالإتجار في الأسلحة البيضاء على الإنترنت بالقاهرة
كشفت التحقيقات في القضية رقم 1059 لسنة2023، أن المتهم أحمد، ش أنشأ وأدار حسابات خاصة عبر فيس بوك ماسنجر، واتس آب، تيليجرام، واستخدم موقعين للتسوق الإلكتروني آمازون، نون، على الشبكة المعلوماتية، لعرض صورًا لأسلحة بيضاء غير مرخص له بحيازتها أو إحرازها للإتجار فيها، وأدار واستخدم الحسابات الخاصة بهدف ارتكاب وتسهيل الجريمتين محل الاتهامين السابقين.
الإتجار في الأسلحة البيضاء بالقاهرة
وحصل القاهرة 24 على نص أقوال المتهم في قضية الإتجار في الأسلحة البيضاء، داخل محلات الأدوات، وجاءت أقوال المتهم كالتالي: هو أنا فعلًا ببيع الأمريكان استيك وبتاجر فيها بس معرفش أن ليها ترخيص وكل محلات الأدوات الرياضية زي النصر والتوحيد والنور بيبعوها عادي، وأنا بشتغل في بيع المستلزمات الرياضية بشكل عام ومن ضمنها الأمريكن استيك ولو أعرف أنها غلط مش هبيعها.
وأضاف المتهم خلال اقواله: لأن أنا الحمد الله من أسرة كويسه أنا مولود في الزاوية الحمراء ووالدي شغال سواق تاكسي ووالدتي ربه منزل وليا اتنين أخوات سلمى ويوسف، وأبويا وأمي ربونا وعلمونا كويس، أنا خريج كلية حقوق وأختي سلمى خرجة كلية تربية وأخويا يوسف في الثانوية العامة، وكنا عايشين في الزاوية الحمراء وفي سنة 2019 أنا اتجوزت وروحت عشت في جسر السويس وبعدها نقلت وعشت مع مراتي في كمبوند اسمه جاردنيا سيتي.
وأكمل المتهم: وبعد أنا ما اتخرجت فتحت ورشة لتصنيع المستلزمات الرياضية وكنت ببيع المستلزمات الرياضية للجيمات وللناس اللي يتطلبها منى وبعدها في سنه 2020 لما حصل موضوع الكورونا وقفت التصنيع وبدأت اشترى المستلزمات الرياضية من المستوردين وأبيعها للناس بسعر أعلى واحد فرق سعر البيع لنفسي وكنت بورد للفنادق مستلزمات رياضية والمواقع التسوق الإلكترونية زي أمازون، ونون، وفي نفس السنة أنشأت شركة اسمها سبورت كيو وبدأت من خلالها أبيع المستلزمات الرياضية بنفس الطريقة بأن أنا بجيب البضاعة من المستوردين وبيعها للناس من خلال بيدج اسمها سبورت كيو على الفيس بوك ويورد المواقع أمازون، تون وللفنادق والنوادي الرياضية.
واختتم المتهم أقواله: واللي حصل أن يوم الخميس اللي فات الساعة 4:30 العصر كلمني واحد كان شاري مني أمريكن استيك قبل كده وقالي أنا عاوز اشتري عشرين قطعة تانية منك وأنا قدامي تلت ساعة وأبقى عندك، وبعدها بخمس دقائق لقيت باب الشركة بيخبط فتحت لقيته واقف على باب الشركة ومعاه قوة من الشرطة لابسين ملكي دخلوا فتشوا الشركة والمخزن اللي جواها وخدوا الأمريكان استيك وبعض مستلزمات الرياضة وبعد كده خدوني على قسم شبرا وطلعوني فوق في المباحث وفضلت قاعد في أوضة من يوم الخميس لحد ما جيت على النيابة النهاردة.
ومن جانبها عاقبت محكمة جنايات شمال القاهرة المنعقدة بالعباسية المتهم بالاتجار في الأسلحة البيضاء بغير ترخيص عبر مواقع التواصل، بالسجن المؤبد وغرامة 2 مليون جنيه.
