ما حدث في المقابر

• القصة دي تفاصيلها هتلاقي نفسك قريت شبها في أمريكا وأوروبا أكتر من مرة.. بس الشيء المُلهم ويمكن كمان المؤلم إنها حصلت بحذافيرها عندنا هنا في مصر ومن 10 أيام.. الموضوع بدأ لما راجل مصري من سكان محافظة القليوبية مات.. أسرته أخدته ودفنوه في مقابر باسوس في القليوبية.

وطبعًا بعد الدفن والزعل الصادق الحقيقي والدموع اللي خارجة من القلوب قبل العيون كل واحد راح يشوف حاله ومصالحه ومش بيفضل الحزن مستمر فترة إلا في قلوب أقرب القرايب.. لحد هنا هي دي سنة الحياة المكتوبة علينا كلنا ليوم الدين، وماتقدرش تلوم على اللي بيمارس حياته بعدها بيوم أو اتنين لإن الحياة لازم تمشي ومش بتقف.. لكن الوضع كان مختلف لكائن تاني غير القرايب!.. كلب جولدن لطيف كان بيربيه الشخص المتوفى وكان بيتعامل معاه بمنتهى الود والحب!.. لما الراجل اتوفى كل الأهل والقرايب اتلخموا في الغُسل والصلاة على المرحوم والدفن وفي حزنهم عليه وطبعًا في الهوجة دي كلها اتنسى الكلب.. أصل إحنا في إيه ولا في إيه.. بس الكلب ماقدرش ينسى أو مايكونش حاضر في الحدث الجلل ده.. بطريقة آلهية ما لا يعلمها إلا ربنا سبحانه وتعالى وصل الكلب للمقابر!.. وتحديدًا قدام قبر صاحبه المتوفى!.. جه إزاي وعرف الطريق إزاي؟.. محدش عارف.. قدام باب المقبرة بتاعته نام الكلب على البلاط الساقع في الجو الصعب ده لا بياكل ولا بيشرب ولا بيعمل أي حاجة غير بس إنه فارد جسمه بمنتهى الحزن وحاطط راسه فوق إيديه الممدودتين.. منظر الكلب كان مُلفت للناس بس محدش اهتم يبعده أو يفكر فيه.. قعد قد إيه؟.. يوم أو اتنين أو تلاتة؟.. لأ.. أسبوع كامل.. لدرجة إن ملامح الكلب نفسه اتغيرت بشكل ملحوظ وجسمه بقى جلد على عضم ووشه بقى ممصوص.. منظره الجديد بقى يشد الناس تتعاطف معاه ففيه اللي كان بيحط له أكل أو ميه أو حاول يزيحه عشان يتحرك.. والحقيقة إن الكلب اللي كان جسمه سايب خالص ماكنش بيستجيب نهائي لأى محاولات من دي كلها!.. لحد ما فيه حد صوره صورة على نفس وضعيته دي وشنرها على السوشيال ميديا على أمل إن حد ييجي ينقذه من اللي هو فيه.. فيه شاب اسمه "جورج الضيف" بيشتغل في مجال الرفق بالحيوان شاف الصورة وقرر إنه يروح يجيب الكلب ده.

الفكرة إن اللي صور الصورة ماكنش كاتب غير اسم المقابر بس بدون تحديد مكان المقبرة اللي قادمها الكلب بالظبط لكن "جورج" أخد بعضه وراح المنطقة وفضل يدور لمدة 3 ساعات كاملة لحد ما لقى الكلب وشاله بالعافية وأخده معاه لمكان مخصص بالرفق بالحيوان وعالج حالته الصحية وبيحاول قدر الإمكان يخرجه من حالته النفسية وزعله بسبب فقدان صاحبه ومش هيسيبه غير وهو في أفضل حال ولما ييجي شخص محترم يتبناه ويراعيه في بيته.. وفاء الكلب لصاحبه كان هيموته لولا رحمة ربنا ولولا إنسانية "جورج" عشان يدينا درس في منتهى النُبل لصفة وطبع مش موجودين في معظم البشر دلوقتي للأسف.

• وفاء الحيوانات اللي بدون حدود رفع سقف توقعاتنا إننا ندور على وفاء شبيه في البشر لكن الحسبة دايمًا بتصب في كفة الحيوانات.. سنين أو شهور أو حتى أيام حياتك اللي هتقضيها مع حيوان أليف هي تجربة إنسانية حياتية هتعيد فيها اكتشاف زوايا جديدة في نفسك.. هتعرف معنى إنك تتحب بدون مقابل.. إنك تلاقي وفاء بدون ما تطلبه.. مفيش حيوان بيكذب، أو بيخون، أو بيغدر، أو بيحور.. معيار حقيقي على رقة قلبك وإنه لسه فيه رحمة، وإن غشاوة القسوة ماعرفتش طريقها له.. في جملة في قمة اللُطف بتقول: "إذا جاءك الحيوان يبحث عن طعام فلا ترده فما أتاك إلا ليزيل عنك كثيرًا من سيئاتك".