لبلبة: عاطف الطيب راهن أحمد زكي على نجاحي في فيلم ضد الحكومة
كشفت الفنانة لبلبة تفاصيل تعاونها مع المخرج الراحل عاطف الطيب والراحل أحمد زكي في فيلم ضد الحكومة، مؤكدة أن الطيب راهن على نجاحها في العمل.
وقالت لبلبة في تصريحات تلفزيونية: انطلاقتي كانت من فيلم ضد الحكومة مع أحمد زكي والراحل عاطف الطيب، ومن حظي أن عاطف الطيب بيحب يطلع النجوم اللي معروفين ويغير الأدوار، وشافني في مهرجان كان وأقل من شهرين جيت مصر والمنتج سعد شنب كلمني وقالي في دور مرشحك فيه عاطف الطيب مع أحمد زكي، ولما قرأت الدور خوفت وكنت بقول فيه كلام جرئ جدًا، وأحمد زكي لما عرف إني هعمل دور المحامية قال على عيني وراسي بس لبلبة هتعمل الدور ده؟.. عاطف الطيب قاله هتشوف، وكأنه متأكد وكسب الرهان.
وأضافت لبلبة: فيلم ضد الحكومة كان أول عمل يجمعني بـ أحمد زكي، وكنا بنصور في المحكمة وفيه أكتر من 100 كومبارس موجودين وشغل صعب، وطلب مني أستاذ عاطف في جملة معينة إن عيني تدمع والدمعة متنزلش، والدمعة تنزل في جملة تانية معينة، وقولت يا رب ساعدني إزاي هعمل كدا يمكن الدمعة تنزل مني غصب عني، وده كان مشهد صعب جدًا، وعملته من أول مرة ووافقوا عليه ولكن أستاذ عاطف مقالش برافو هايلة.. وسألت أحمد قولتله هو أنا كنت كويسة؟، قالي أنتي مشوفتيش عملتي إيه؟، أنتي عملتي مشهد عبقري.
واختتمت لبلة تصريحاتها قائلة: وأنا كنت شايلة هم ليه الأستاذ عاطف الطيب مقالش برافو، ورجعت البيت يومها معيطة وحكيت لأمي اللي حصل وقولتلها الأستاذ الظاهر أنه خد مقلب فيا، وأنا مش عجباه، قالتلي مش هتقدري تكملي تصويرك طول ما أنتي مش مرتاحة، أسأليه، فسألته وقالي طالما قولت اللي بعده يبقى أنا موافق على المشهد.
