مكنتش اعرف المرض.. علي السبع: قابلت شخص متوحد في حياتي قبل مشاركتي في حالة خاصة مع طه دسوقي
أكد الفنان الشاب علي السبع، أنه التقى شخصا مصابا بالتوحد في حياته عندما كان طفلًا، ولكنه لم يكن يعلم معنى هذا المرض، إلا بعدما شارك في مسلسل حالة خاصة بطولة طه دسوقي، والذي يعرض حاليا.
وقال علي السبع خلال لقائه مع القاهرة 24: أتمنى إن في الأعمال الفنية نناقش القضايا والأمراض المهمة، زي مناقشة التوحد في مسلسل حالة خاصة، أنا عن نفسي مكنتش أعرف معلومات كفاية عن المرض ده، وكل علاقتي بيه كانت إني كان ليا صديق قريب من العيلة عنده توحد، بس كنت صغير أوي وقتها فا مكنتش أعرف إن ده هو التوحد.
وتابع علي السبع: فمفهمتش أكتر عن التوحد غير لما درسناه أكتر في المسلسل ولما شوفت طه وهو بيذاكر للشخصية، ولما اتعامل مع ناس مصابين بالتوحد ومع مؤسسات التوحد، فـ أنا اتعلمت كتير من الموضوع بمجرد اللي بشوفه قدامي، وده اللي هيحصل برضه لما المُشاهد يشوف المسلسل.
مسلسل حالة خاصة
وسبق وتحدث علي السبع عن مشاركته في مسلسل حالة خاصة، وقال خلال لقائه مع القاهرة 24: مسلسل حالة خاصة هو فعلا حالة خاصة، وبحمد ربنا إنهم اختاروني في الدور ده، والشغل مع المخرج عبد العزيز النجار كان ممتع جدا، ده أول عمل كبير له، وكان عارف يوجهنا ويسمعنا ويخلي في إحساس التعاون بينا، وأتمنى إن في الأعمال الفنية نناقش الأمراض المهمة زي التوحد في المسلسل.
يشارك في بطولة مسلسل حالة خاصة كل من الفنان طه دسوقي، غادة عادل، علي السبع، أحمد الأزعر، وغيرهم، والعمل من إخراج عبد العزيز النجار.
