مصطفى كامل مُتحدثًا عن فكرة استقالته: عيالي بقوا يخافوا يكلموني
تحدث الفنان مصطفى كامل، عن الضغط النفسي الذي يُعاني منه مُنذ توليه منصب نقيب المُهن الموسيقية، مؤكدًا توتر العلاقة بينه وبين أولاده بسبب ما تعرض له من ضغوطات.
وقال مصطفى كامل، في تصريحاته لـ القاهرة 24،على هامش حضور أعضاء النقابة بمنزله لإقناعه بالتراجع عن قرار استقالته من منصبه: مراتي قالتلي من أسبوعين بيتنا اتوتر.. وولادي بيخافوا يكلموني لأني طول اليوم في مشاحنات.
حلمي عبد الباقي: مصطفى كامل نقيب الغلابة
ومن جانبه، علق الفنان حلمي عبد الباقي، على حديث الفنان مصطفى كامل: إحنا يا مصطفى كل المجلس بالسادة الموظفين جايين مخولين من الجمعية العمومية قبل نفسنا، والله ما رياء ولا نفاق، وكل الناس بتقولك إحنا بنبحبك ومنقدرش نستغنى عنك، وإحنا كمجلس وجمعية عمومية بنقول أنت عملت إيه بالورق والمستندات والعلاج اللي اتطور والإيرادات اللي اتطورت بشكل خرافي كل ده في ميزان حسناتك كإنسان قبل كنقيب، وإحنا كلنا موجودين وأي سلبيات هنتجاوزها.
وتابع عبد الباقي: كل الناس بتقولك يا نقيب الغلابة إحنا منقدرش نستغنى عنك، والنهارده كلنا قدامك والناس كانت عايزة تجيلك البيت، ومنقدرش نستغنى عنك كإنسان ونقيب ومينفعش بعد كل الإنجازات دي تقول أنا مش موجود، وأنا بقولك في عدم وجودك الدنيا هتغرق، وكلنا في ضهرك وكلنا على قلب رجل واحد، وأنت على رأس المنظومة وعملت كيان جديد ومنفرد.
